2002 Gujarat rara ken o nung Nanavati panel-i Modi maitsür

Gandhinagar, December 11 (Agencies): 2002 küm Gujarat nung rara tulu adoka Muslim nunger timba ser nisung 1000 dak tema asüba ken o nung Nanavati Commission-i taoba Gujarat chief minister Narendra Modi-i aniba sorkar maitsü.
Commission indang report ji Gujarat legislative assembly nung minister of state for Home, Pradeepsinh Jadeja-i benok.
Commission indang report nungji yamai shia lir, “Item raraji state nung minister kari ajungshiba ta asütsüsa kuli mali.”
Police nübo peria maliba mesüra raraba hadir junga maliba ajanga parnoki tesem kar nungbo lokti mazüoktet, ta report nungji shia lir.
Commission-isa, “Ahmedabad yimti nung tamangba lokti tsüngda raraba tatalokba nungbo police-i junga inyakogo,” ta metetdaktsü.
Taoba mapang Supreme Court Justice, G T Nanavati (retd) aser taoba mapang Gujarat high court Justice Akshay Mehta (retd) nati 2014 küm taoba state chief minister, Anandiben Patel nem 2002 küm rara indang report agüja liasü.
2002 küm Godhra railway station anasa Sabarmati Express train coach ana arongba sülen state nung rara tulu adokba ken o bushisüngdangtsü atema 2002 küm taoba state chief minister, Narendra Modi-i commission dang tuyua liasü.