2002 Gulbarg Society ken o nung nisung 24 aitsüogo

Ahmedabad, June 02 (Agencies): 2002 küm nisung jenti tepsetba Gulbarg Society ken o nung Ahmedabad court-i tai tonglokja alir nisung 66 nungi nisung 24 aitsüogo, aser court-i 36 chiokogo.

Court-isa, Gulbarg Society nung nisung jenti tepsetbaji jilia sentong yangluba ka masü saka maneni amakba ka lir, ta ashi.

Iba ken o nung aitsür nisung 24 rongnungi nisung 11 nisung tepsetba ken o nung aitsü aser nisung 13 tanga ken otem nung aitsüogo.

Iba ken o nung aibelenertem nem June 6, 2016 nü temerenshi obendang agütsütsü.

Aitsür rongnung VHP lenirtem densema lir. Tai tonglokja alirtem pusemtsü atema Haresh Bhatt aser Jaydeep Patel na densema VHP lenir aika court-i arua liasü.

Parnokisa, parnoki iba obendang anema temaba court nung benoktsü, ta ashi.

Tai tongokja aliba agienba rongnung taoba mapang Meghaninagar police inspector, KG Erda densema lir. Gulbarg Society nung alirtem kümzüktsü melena pai pa mapa senzüka toktsüba ajanga pa nem tai tonglokja liasü.

Ano tai tonglokja aliba agienba rongnung BJP councilor, Bipin Patel aser taoba mapang Congress councilor, Meghsingh Chaudhary na densema lir.

Iba ken o ya küm tenet tashi kayonga aru aser obendanger balala pezü matsüngdang iba ken o kaaogo.

Special judge, PB Desai-i iba obendang agüja liasü.

Special court-i iba ken o ya 2015 küm September ita nung tembanga liasü, saka iba obendang agütsütsü atema Supreme Court-i sota liasü.

Iba mapang nung SC-i trial court dang obendang May 31 nü agütsütsü tuyua liasü.

Supreme Court-i shimba Special Investigation Team (SIT)-i bushisüngdangba ken o teku rongnung Gulbarg Society ken o ya densema lir.

Taoba mapang CBI tongti, RK Raghavan lenisüba nung SIT-i item ken o bushisüngdanger.

Tai tonglokja alir parnok 66 rongnung ken o akadang nisung pongubo asü. Iba ken o nung kuliser nisung 338 indang kuli angadanga liasü.

Ahmedabad nung Muslim nunger aliba ki, Gulbarg Society nung bungalow 30 shi aser apartment block 10 aliba ki ya 2002 küm Godhra nung Sabarmati Express train rongtoktsüba sülen anogo ka lir maaka liasü. Iba tatalokba nung taoba mapang Congress MP, Ehsan Jafri densema nisung 69 asü.

Iba tatalokba sülen tasümang 39 angu aser Jafri den arishi küm 14 tebur ka tenüng agi Azhar Mody densema nisung 31 mangu. Küm tenet sülen parnok samar alir nisung 30 süogo ta sangdonga liasü. Tanüngba nisung ka, Muzaffar Shaikh 2008 küm taküm angu.

Pa Hindu nunger kibong kati anitet aser Vivek ta tenüng melenja liasü.