2002 ken o nung Salman Khan metentsüogo

Mumbai, December 10 (Agencies): 2002 küm nisung tsüksetba ken o nung Bombay High Court-i Bollywood megastar Salman Khan metentsüogo. Iba obendang agütsüli Salman Khan-i anisüngzük tepela nüktzü aitokdang par kinungertem pa den densema pelatepa liasü.

Obendangdak takdang nung osangbenertem, Bollywood nung shilem agirtem aser okatsürtem aika sendena lia iba obendang agütsüdang, Justice A.R. Joshi-i, “Actor sang dak tai metongloktsütettsü, kechiba süra küm 13 tashi iba ken o angadanga aruba mapang bendenba kulitem nung pa aitsütettsüsa kuli tejangja kecha mali,” ta ashi.

Anungji Salman Khan tepuokdak küm pongu ayutsü obendang agütsür aliba court-i ageintsüogo.

Iba obendang angashiba sülen Salman Khan nüktzü yima, “Ni iba obendang kanga ajemalua agizüker. Ni asoshi sarasademtsür ozü kibong, tembartem aser ni sapurtem ajak dang kanga pelar,” ta pai twitter ajanga lemsatepa liasü.

Salman’er kima pa sapurtemi benjung dang apokba tapoktsü poka pelatep.

Pa atema okatsür Amit Desai-i, “Küm 13 tashi jembia aruba ken o nung Salman Khan metenba ajanga anisüngzük tulu nguogo. Pa iba ken o nung meshi meshia metenogo,” ta ashi.

Justice Joshi-i, “Salman Khan anema ken o benokertemi tapu ajaklen nungi pa aitsütsüsa kuli tejangja bener marutet aser ibaji ajanga lenmang tezülen mejanga alir ka menüngsetba aser nisung pezü yirutsüba lendong nung Salman Khan yi jemer laisü aser masüar kuli tejangja mongutet,” ta ashi.

Iba den külemi Salman-i ania aliba gari tsüngji item nisung dak memenüngdang asü mesüra menünger apokar mejangjateter.

“Asenoki ozüngi teyuba ama kuli tejangja dak ajemdaker obendang agütsütsü nüngdak. Nüburtem mesüra osangbenertemi rongshiba ajanga ken o manisadaktsütsüla,” ta Justice A.R. Joshi-i ashi.

“Mumbai Sessions Court-i obendang agüja alibaji magitsü. Salman dang senchi chia aliba ajak meyiba agütsütsü aser pa indang passport-a meyiptsütsü,” ta Joshi-isa ashi.

Karjat, Raigad district nung film tangoktur court-i tuyuba ama pa Mumbai nung iba ken o angadangdak adentsü asoshi Brihostibarnü tonga aru.

Salman Khan ya Jodhpur nung 1998 küm mesü tapu ka, ‘blackbuck’ kahsetba ken o dak sentakba nung ano obendangdak nokdaktsüba lir.