2004 küm nungi Delhi nung ki malir 33,000 süogo: MHA

New Delhi, October 18 (Agencies): Linük yimtiba, Delhi nung 2004 küm nungi tan ita tashi nung ki malir nisung 33,000 süogo, ta Union home ministry-i ashi.
Union Ministry kübok zonal integrated police network-i sayaba data ajanga, January 2004 nungi October 2015 tashi nung Delhi nung ki malir nisung 33,518 süogo, ta metetdaktsü.
Ki malirtem timba asübaji taküm June ita 3,695 asü.
Data benteta yanglusang, Centre for Holistic Development nungi Sunil Kumar Aledia-i, nisung jenti asübaji aonung jenoktak kanga ajema aliba ajanga lir, ta ashi.
“Delhi nung ki malir nisung 150,000 jungnüa lir, aser parnok rongnungi nisung 4,890-i dang tejenoktak angur,” ta pai ashi.
“Linük yimtiba nung tesem tila nung mejeptepa mejangba ajanga tashitak menateper. Parnok aiben lenmang tezülen mejanger, iba yongji lendong ajurutsüsa akumer,” ta pai ashi.
“Lenmang nung mejangba nüburtemjibo toktsür tejenoktak kidang alirtem-a yangji nüngdakba ajak mangur aser ibaji ajanga tashitak tamajung aika menazüktsüsa akumer. Delhi Master Plan-2021 telatetba den medemdangra tejenoktak tesemji shilem 87.4 agi mepirir,” ta pai ashi.
Delhi nung tejenoktak ki 184 nungi 82 dang teti atema, saka tanüngba 102 jibo khen atema dang; Ibaji Delhi Master Plan-2021 kübok shilem 12.6 dang lir. Master Plan apibo, linük yimtiba nung ki malir ajak asemtsü asoshi tesemji square feet 19,37,520 nüngdak, ajisüaka yimti nung tejenoktak ki acha ayanger, Delhi Urban Shelter Improvement Board (DUSIB) ket nung square feet 2,44,507 dang lir, ta paisa ashi.
Tawa Delhi Commission for Women chief, Swati Maliwal-i ajungbena tejenoktak ki kar semdangba mapang DUSIB-i item tejenoktak ki junga acha ayang masüba reprangteta liasü.
Maliwal aser DCW züngsem, Sarika Chaudhary nungeri Nizamuddin aser Jama Masjid tesemtem nung DUSIB-i acha ayangba tejenoktak ki kar semdanga liasü.
“Metsümeshitak kar dang liasü. Tetsürtem atema metsümeshitak balaka yanglua maliasü. Tetsürtem aser teburtem atema aonung tejenoktak complex ji kecha tenokdangba makai kasa nung anasatepa liasü,” ta Maliwal-i osangbenertem dang ashi.
“Aonung tejenoktak acha ayanger DUSIB director, T.K. Meena dang iba indang metetdakja ni shidi ka züluogo aser osang tejangja meshiogo,” ta laisa ashi.