2005 küm Delhi bomb lendong ken o nung Tariq Ahmed aitsü

Delhi, February 16 (Agencies): 2005 küm Delhi nung bomb aika pokdaktsüba ken o nung aija Tariq Ahmed Dar küm 10 tepoukdak ayutsü obendang agütsüogo.
Ano külen kasa ken o nungsa tai tonglokja alir ana- Mohammed Rafiq Shah aser Mohammed Hussain Fazili na den tangartem anemabo kuli peria menguteti chiokogo.
State anema rara ayongba, raraba oset bendenba aser nisung tepsetba ken otem nung 2008 küm Ahmed Dar den nisung ana anema ken o benoka liasü.
Delhi Police-i ashiba agi, Dar indang phone call osangtem ajanga pa Lashkar-e-Taiba (LeT) züngsemtem den tesendaktep liasü ta kuli bushitet.
2005 küm bomb aika pokdakja amakdang nisung 60 dak tema asü aser aika yiru. Iba lendongji Diwali benjung atongtsü anogo ana dang anünga lia atalok.
Item bomb ji Central aser south Delhi nung aliba market ana nung aser south Delhi nung bus ka anasa pokdakja liasü.
Mezüngbuba bomb ji nikongdang 5:38 ako nung New Delhi Railway Station anasa Paharganj nung aliba market nung pokdaktsü aser tanabuba bomb ji nikongdang 6:00 ako meta Govindpuri tesem nung bus ka anasa pokdakja liasü.
Paharganj nung aliba market nung bomb ji motorcycle ka nung sendaka yutsür pokdaktsü.
Tasembuba bomb ji south Delhi, Sarojini Nagar market nung pokdaktsü, aser iba bomb ji gas cylinder amshia shishilembar ka dokan anasa apokba ajanga lendong tuluba ajangshia anasa aliba dokan aika rongdok.