Meyipa Reprangshidi

~ Mrs. Akumla, Dimapur 

2008 küm 11th April nung Tsüngremi kü dang pongmang nung town aser yimtak aliba Arogo anaprongla arakzüa taküm aliba Arogo asütsü sarasademang ta ashiba tang tashi kü mulung nungi moi sarasademer.
Iba sülen 2011 küm 30th September nung Ao lima nung asentenshi akatsüla, saka kipoksema atu nung parnok ajak pei pei nüngdaki omadoker shinga majurur ta kanga temulung shiranga ashi.
Iba ama tanela tejembiba ajanga kü mulungjang tipmedemi kümdaktsü. Anungji iba mapang nungi sarasadema arudang asen limai taoba mapangtem nung asentenshi aruba otsü bushidanga tesüiba aser tanü tensa tamangertem tia asadangdangtsü tangatetba agütsü. Iba otsütem züngdanga arudang ya ni asoshi tajungshiba tulu liasü. Anungji ni ama kar danga temoatsü ngudisü ta amanga tongmelang agi lemsateper.
Temeim amangba purtem,asen limai Khrista osangtajung arur joko küm 150 abensa-a arur. Item mapangtem tsüngda nung tamangertem tanela nung tashi itshitsü asoshi Tsüngrem taochi agi asentenshi aiben yoka aruogo.
Asentenshi ajanga Arogo, Yimten aser loktiliba ajak nung temelenshi tulu adoka tzümetsüng agi janarüja ajak ponger orr ali tema merüktetba ama kanga topur junga süngjema iba revival temoatsütem masadangteti aseni agia aruogo, iba ya aseni mamadokli. Tsüngremi asen nem moatsüba yari Pa mulong achitsüsa asenoki liteter asü masü aser Pa nem meyipa agütsür asü masü shisadangdi. Aser shiba nemsa jenti agüja lir, pa nungi jenti akangtsü.’ Luk 12:48
Iba asentenshi putu nungji nübortem tanela nung tzüra-a jangrabangraba tulu nung Sentepi aotsü yongyaba, Sentep mapang taküm kuli shinüba,ken ajanga külisünüba jenti liasü. Lokti sentepdak, alu lenmang nung aser gari nung aodanga revival ken tena kuli sütepa jaja.Alu nungi atokdanga tamasa tenla kidangi oa sarasademerang pei kidangi ao. Arogo kar nungbo ghonda 20/30 tashi sentep mesenshi-i tanelai mapa inyakba ajanga nübortem ya-a tzüra-a maitdaktsü. Tanela ken mejemer jenti adok. Laishiba kanga jangra-a azüng, Ano Laishir jenti adok. Khristan ka ama achiajemba, jaklaliro aser sübosolem yimyatem melenshia ali.
Tsüngrem tenzükertemi anir Yimsüsürtem, govt. tenzükertem ajaki pei ataba mapa nung nendaka aser ochishia inyakba ajanga asen lima terenlok den nübortem tesünep aser yimchiyimjung nung liasü. Putu menden lemsar aliba longjema aküm, kimonglomong raktepba,tama tesü aruba otsü jembiba melenshia teputep aser telongjem nung alitsü angazük. Danga yimsü amangertema aika temulong meyipa Khrista dangi aruba ajanga Arogo tasen Hindi,Nagamese aser Nepali church etc, lapokyonga ao. Ter shilem aser danga tenlatem ochishia aser mulongsoa agütsü.etc,
Yamaji ken mapang kabo asen limaji jangratemtsüka temeim, teputep aser tesüngjem nung lia aruogo.Saka reprangdangra tanü asenok tamangertem aika Tsüngrem nungi atsüngzüka oa tanela milen remsepa odagi. Asen lima teraksa yanglutsü asoshi ajaki jembir saka ni aser na memelenshira koda yanglutsü. Iba ama tensa ka nung Tsüngremi Pa temulung masüba chichia ashiba ya asenoki kanga dang aroka shisadangtsüla.
Tesüiba indang jembitsü nüngdak mali mesüra meyipa reprangtsü menüngdak ta karibo ashitsü südi.Saka tesüiba anogotem bilemteta meyipa reprangshiba ajanga akhidang dang nungi tanü tajungba aküm asü maküm ibaji puteter, aser tarutsü jenjang tajungba atema renemshir.
Joko tesüsaba revival arur kum 40 shi abensa-a arudang tesüiba revival nung pei temulong meyipba anogo aser Tsüngremi jatetba anogotem bilemteta pei tanela jenjang ain asü main ken meyipa reprangshidi. Revival mapang Tsüngremi nübor ajak ajungtsü asoshi Tanela sempet balala agütsübato ano tali meshiteta Tsüngrem nem bendanga agütsüshidi. Kija aser lokti tenangzükba balala nangzükbatem tamakok lira ajia meyipa reprangshidi. Tsüraburtem aser taintemji mitkar ka ka lir, asenok amoa oa lira lanuasensortem dang kechi ashitsü tsükchiri parnok agiadoktsü
Naga lima Khrista asoshi, Temesepba chiyongtsü mayoktsü, machitsü, majemtsü nokdangba lima,(Dry State) Missionary meyirjang ter yoktsüba nangzükba lima,item takok ngua inyaktsü lanu asensortem teinyaktsü tulu lir. Anungji lanurtema Tsüngem nem bendanga agüja renemshir apusoangma.
Asentenshi aruba otsü reprangdangra amangba purtem tanela nung lula-a tashi meiti aliba mapang iba nung jagi meyipa arutsü asoshi Tsüngrem taochi agi asentenshi yoker, nisungi aginüa jangraba kisüng agi revival arutsü makok. Saka aji asenok daka keta lir,
” Kü nubor shirnok kü tenüng agi jaa lir, parnok sasa ajemaludi süra,aser sarasademra, aser kü jak bushira aser parnok tamajung lenmang nungi meyipra, idangji ni kotak nungi angashitsü aser parnok temenen atoktsü, aser parnok aneptsütsü”. 11.Puti 7;14.
Arung asenoki ajemaludi, sarasademdi, Tsüngrem jak bushidi aser tamajung lenmangtem nungi meyipdi yamaji süra Tsüngremi asenok semdangtsü. Asenoki ken nung atenba ama asentenshi mapaji kü dak nungi tenzükdakjang ta Tsüngrem dang mepidi. Asenok melenshira teraksa limaji kotak lima ama, meputepba telokji teputep, temeimtep,tesünep aser yimjiyimjung nung alitsü. Tazüngertem ajak Tsüngremi moajangma. Metokmeperi kar lira tangatetba tajung agi metongshia agitsü mepishir.

You must be logged in to post a comment Login