2008 küm Gujarat bomb lendong agütsür tongti, Qureshi puogo

New Delhi, Aenjeti 22 (Agencies): 2008 küm Gujarat nung bomb lendong atalokba sülen küm 10 junga lir tang tesüsa iba lendong agütsütsü atema sentong asameyanger tongti aser Indian Mujahideen (IM) co-founder, Abdul Subhan Qureshi, Delhi police-i puogo.
DCP, Pramod Kushwaha-i, tesüiba küm aika Qureshi telung nung jenshia liasü aser pai pa tembar ka Ghazipur yimti nung ajurutsü atema India-i meyipa aru, ta metetdaktsü.
Tanü New Delhi nung osangbenertem den jembidang DCP Kushwaha-i, “Abdul Subhan Qureshi ji taila documents bener Nepal nung liasü. Indian Mujahideen telok asentenshidaktsütsü atema pa India-i meyipa aru,” ta metetdaktsü.
Special Cell teams aser tanga intelligence agency temi arishi küm 46, Qureshi bushia liasü, aser mapang tatsüka khatepba sülen pa apu; iba sülen pa court ka matsüngdangi anir ao, aser police nem anogo 14 atema agütsüogo, ta DCP Kushwaha-i ashi.
2008 küm July 26 nü Ahmedabad nung bomb 21 pokdakja lendong tulu atalokba sülen anogo ka dang lirbo Qureshi bushi tenzüka liasü.
‘India nunger atema Bin Laden’ ta ajasang, Qureshi ya pa tejak tereprangtsü melenshiba nung mongin ka lir, iba yongji pa aiben police dang nungi jenbua aruogo. Qureshi dang ya ‘techie-bomber’ taka ajar, kechiyong pa ya bomb yanglur mongin ka lir. taoba mapang Bengaluru aser Hyderabad yimti na nung pa Indian IT companies nung inyaka liasü. 1998 küm SIMI-i pa telok nung züngok aser iba sülen pai tangar den senteper Indian Mujahideen telok tentet.