2009 nungbo India kija liasü saka tangbo alima pusemer: Sushma

New Delhi, March 15 (Agencies): Tanü External Affairs Minister, Sushma Swaraj-i, JeM tongti, Masood Azhar alima kiralongrar tarensen nung dendaktsütsü atema UN nung benokba nung China-i nokdangbaji ‘yimtenren tamakok ka lir’ ta jembir lenirtemi ya metettsüla- 2009 küm UPA yimsüsüba mapang nung India-i iba onük benokba mapang nungbo India kija liasü, ajisüaka tangbo alima linüktemi iba onük nung India pusemer, ta metetdaktsü.
Azhar ya alima nung kiralongrar tarensen nung dendaktsütsü atema UN nung benokba China-i nokdangba atema Congress Tir, Rahul Gandhi-i Ato kilonser, Narendra Modi aitsüba sülen tanü Sushma-i iba o ya jembiogo.
Rahul-i, Ato kilonser ya tashimait aser pai China Tir, Xi Jinping tsübur, ta aija liasü.
Twitter ajanga, Swaraj-i, “Iba onük ya pezüben benokogo. 2009 küm UPA yimsüsüba kübok India kija liasü. 2016 küm India-i benokba onükji US, France aser UK-i pusem. 2017 küm US, UK aser France-i pusem. 2019 küm US, France aser UK-i iba onük benok aser UN Security Council züngsem linük 15 nungi züngsem 14-i pusem, iba dak alia Security Council nung mezüngsemba linüktem Australia, Bangladesh, Italy aser Japan linüktemia pusem,” ta metetdaktsü.
“Ni item osang ya metetdaktsüogo, anungji onoki yimtenren inyakyim nung tamakok angu, ta jembirtemi ya metettsüla- 2009 küm nungbo iba onük nung India kija liasü saka 2019 küm nungbo alima linüktem aikati India pusemer,” ta external affairs minister-isa metetdaktsü.