2010 küm apuba Canada nunger ka Taliban-i chiok

Toronto, January 12 (Agencies) : 2010 küm Afghanistan nung Taliban-i apuba Canada nunger ka chiokogo.

Hombarnü Canada foreign minister Stephane Dion-i sangdong ka nung ashiba agi, Colin Rutherford chiokdaktsütsü atema inyakba mapa takok nguogo.

Rutherford ya Afghanistan nung tourist ka liasü aser 2010 November nung Taliban-i pa apu.

2011 küm Taliban-i Rutherford indang video ka saya aser iba nung pa itdangitrir ka ta aija liasü.

Ajisüaka, Rutherford-i pa itdangitrir ka masü ashi aser pa Afghanistan nung puti otsü indang tesem aser tekülem kitem indang otsü angajemtsü atema aruba liasü ta kuli agütsü.

Taliban-i Rutherford chiokba indang osang yimjak nung memetetdaktsüi lir saka foreign minister Dion-i iba mapa nung Qatar-i yariba atema pelaba metetdaktsü.