2012 küm tetsür raksatsür ‘Juvenile’ chiokogo

New Delhi, Dec. 21 (Agencies): 2012 küm tebur telok kati tetsür ka tashiyim amshia taküm raksatsüba ken o nung aija alir juvenile (arishi küm 18 tekübok lanur ka) chiokba anema DCW-i mepishiba tanü Supreme Court (SC)-i magizük.

Juvenile sangji Deobar nü chiokogo aser NGO ka dangi yokogo.

Delhi Commission for Women (DCW)-i juvenile mechioktsü atema mepishibaji Justice ana- AK Goel aser UU Lalit nati akümba SC indang vacation Bench-i magizük.

“Langka inyaktsüsa süra, ibaji ozüng nung ajemdaker inyaktsü. Onoki ozüngji benshitsüla,” ta SC bench-i ashi.

Obendang agütsüdang SC-i DCW dang, parnok tebilemtsüji parnoki lemsateper, ajisüaka tang aliba ozüng kübok juvenile kaji küm asem dak tema mepouktsüla, ta ashi.

Osangbenertem den jembidang DCW tongti, Swati Maliwal-i, iba ya linük atema tanak anogo ka lir, ta ashi. Laisa, Rajya Sabha-i linük ashioktsüogo, ta ashi.

Delhi nung Paramedical kaketshir ka tashiyim amshia taküm raksatsüba aser tepsetba ken o nung juvenile denji nisung pongu apu. Iba sülen Juvenile Justice Act kübok pa taküm melenshitsü kidang küm asem ayu. Kechiyong iba Act kübok ozüng nung juvenile kaji küm asem tashi dang puoka ayutsü lateta lir.

Iba ken o nung parnok trok rongnung kabo Tihar Jail nung süogo. Trial court kati tanüngba nisung pezüji tasüba agi merenshitsü obendang agütsü aser parnoki mepishibaji SC nung anendaka lir.