2014 küm India nung ghonda shia nisung 15 soseta asü: NCRB

New Delhi, July 19 (Agencies): Yaküm küm linük nung ghonda shia nisung 15 soseta süogo, aser soseta asür ajak agi nisung lakh 1.31 liasü, ta sorkar data ka ajanga metetdaktsü.
Asürtem timtibaji Maharashtra state nungi aser yimti rongnung asürtem timtiba asübaji Chennai nungi liasü.
National Crime Records Bureau (NCRB)-i sayaba osang ajanga ashiba agi, soseta asürtem shilem 69.7 ji küm ka nung sen lakh 1 dak tajemba angurtem lir aser soseta asür nisung trok nungi nisung kabo kinüngtsütem lir.
2014 küm Maharashtra nung soseta asür nisung 16,307 liasü aser tanabuba o tasembuba jenjang nung Tamil Nadu (16,122) aser West Bengal (14,310) na liasü, ta data ajangasa metetdaktsü.
Item state asem shilemji Maharashtra 12.4, Tamil Nadu 12.2 aser West Bengal 10.9 liasü.
Ano nisung lakh 10 dak tema aliba yimti tulutem rongnung Chennai nung nisung 2,214 soseta asü, Bengaluru nung nisung 1,906 soseta asü, Delhi nung nisung 1,847, Mumbai nung nisung 1,196 aser Bhopal nung nisung 1,064 soseta süogo.
Asürtem shilem 21.7 kibong khuret aser tebilemtsü balala ajanga asü aser shirangba dak sentakba ajanga shilem 18 soseta asü.
Data ajangasa, soseta asür nisung 6 shia nungi nisung kabo kinüngtsütem liasü aser 2014 küm soseta asüba tebur-tetsür ratio ji -68:32 liasü.
Soseta asürtem shilem 69.7 shi küm ka nung sen lakh ka dak tajemba angurtem liasü aser soseta asür shilem 26.9 shi küm ka nung sen lakh ka nungi 5 tashi angurtem liasü, ta kasa osang ajanga ashi.
Ano yimya balala nung soseta asüba rongnung soseta asür shilem 41.8-i lisü agi alenseta asü, shilem 26-i miim chir asü, shilem 6. 9-i pei sasa mi agi rongseta asü, shilem 5.6-i tzü nung arakseta asü aser shilem 1.1-i kilem nungi pongoktsüba mesüra train jakdang pongloka asübatem liasü.