2014 sülen tan mezüngsüa NATO-Russia Council senden amentsü

Brussels, April 09 (Agencies): North Atlantic Treaty Organization (NATO) aser Russia nati tarutsü mapang ajurutepa senden amentsü sentong renemba osang ka Russia deputy foreign minister, Alexey Meshkov-i metetdaktsüogo.
NATO-Russia Council 2002 küm tentet saka Russia-i Ukraine nungi Crimea peninsula tashiyim agi 2014 küm agiba ajanga par teloktep sendenji mementsüsa aküm aser iba mapang nungi tenzüka tanü tashi teloktep sendenji memeni lir.
Yamaji aruba sülen NATO aser Russia naprongi ambassador jenjang nung par teloktep sendenji Belgium yimtiba, Brussels nung taruba hopta 2 tsüngda menshitsü mulungba osang metetdaktsüogo.
Ajisüaka, senden amentsü asoshi anogo latetba osangbo telok anaprongi memetetdaktsüi lir.
Ukraine ken o nung ajemdaker West aser Russia na tsüngda tangasa tesendaktep junga meyangluteti lir saka tan teloktep senden menshitsü lemtetba ajanga West aser Russia nati tanaben sentaktepshitsü mulungba kuli angur.
Tan amentsü ayongba senden nung Ukraine sorkar aser sorkar anemer na tsüngda mangatettep adoka tongpang raraba den sentakba onük benoktsü renemba osang ka NATO-ia metetdaktsüogo.
2014 küm April ita nungi tenzüka Ukraine nung tongpang raraba ajanga tanü tashi nung nisung 9000 dak tema asüba osang bushiteta lir.