2015-16 tsüngda VDB atema sen lakh 2400 lemzüktsü

Kohima, March 18 (TYO) : Sorkari teyari agütsüba tongtipang sentongtem rongnung VDBs nem Grant-in-aid agütsüba ya ka lir. Nagaland nung VDBs 1238 lir aser item kübok alimelen saru agütsür kilen 2, 29, 684 lir.

Iba osang ya Rural Development & REPA Minister, CL John-i Department of Rural Development indang annual administrative report 2015-16 agütsüdang ashi.

VDBs nem Grant-in-aid agütsübaji alimelen saru agütsür kilen sasep nung terenlok mapa inyaktsü atema sen agütsür. VDBs Grant-in-aid nung tetsür nem shilem 25 lemzüktsür aser ano lanurtem asoshia shilem 20 lemzüktsür, ta Rural Development Department ajanga metetdaktsü.

VDBs Grant-in-aid ajanga yimtsüng tia nung aliba nisung ajaki shilem agitettsü maongka agütsür. Ano iba sentong kübok VDB Welfare Fund ta ser scheme ka tenteta lir. Iba inyakyim kübok kilen 50 ser teküpok aliba yimtsüng kati sen 10,000 aser kilen 51 ser tema aliba yimtsüng ajak nung kilen shia sen 200 sendong nungi agiteta ayur. Iba senji VDB tem inyaksangshiba balala nung amshir, ta Rural Development Department osang nungsa shia lir.

VDB Welfare Fund nung küm 6 tashi sen bendena ayur aser iba nungi tetemzük anguba jagi VDB maparen nung amshir aser sendongji tanaben enoka ayur. Iba inyakyim ajanga sorkari VDB nem Grant-in-aid agütsüba sen den yaria mapa inyaker.

State rongsenkettsüng jenjang mejungi aliba ajanga 2015-16 asoshi VDB Grant-in-aid atema sen lakh 2400.00 dang enoktet. Shitakba agibo Grant-in-aid ji sen lakh 2918.00 nüngdaka liasü. Sen nüngdakba ama menoktetba ajanga kilen shia nem sen 1000 magütsütettsü, ta parnokisa metetdaktsü.