2015-17 küm paramilitary sepai 400 shi asü

New Delhi, Yimpoksüi/November 21 (Agencies): Tesüiba küm asem (2015-17) nung India-Pakistan arrtsülen injang yokba, kiralongrartemi amakba aser telungpur den raradang paramilitary sepai 400 shi süogo, ta tanü sorkar ketdangsertemi metetdaktsü.
Kiralongrar aser telungpurtem den raradang asürtemji Border Security Force (BSF) sepaitem timba liasü.
2015 nungi 2017 küm tsüngda BSF sepai 167 tashi asü aser parnok timba ka arrtsülen lendong aketba tesemtem nung asü.
Lasa kümtem nung Central Reserve Police Force (CRPF) sepai 103 asü, aser parnok timbaka Maoists telungpurtem aser Jammu & Kashmir nung telungpurtem den raradang asü, ta Home Ministry ketdangser kati metetdaktsü.
Ano tesüiba küm asem nung Sashastra Seema Bal (SSB) sepai 48 asü aser India-Bhutan aser India-Nepal arrtsü anüker SSB sepai-a aika asü.
Kasa mapang nung India-China arrtsü anüker Indo Tibetan Border Police (ITBP) sepai 40 asü aser India-Myanmar arrtsü anükba den northeast nung telungpur den rarar, Assam Rifles sepaia 35 asü, ta kasa osang ajanga metetdaktsü.
Anü tesüiba küm asem nung Central Industrial Security Force (CISF) sepai ana asü.
2016 aser 2017 küm nung CISF sepai kaka asü saka 2015 küm nungbo CISF sepai kata masü.
CISF sepaitemi airports, nuclear installations, metro services aser tongtibang tesemtem anüker, ta ketdangserisa metetdaktsü.