2015 küm China nung drugs tonne 23 apu

Beijing, January 31 (Agencies): 2015 küm Yunnan province, China nung ketdangsertemi ozüng alema amshiba temesepba mozü (drugs) tonne 23.3 (kg 23300) apuba osang jangjaogo, ta police-i Deobarnü metetdaktsüogo.
Yaküm linük arrtsü tsütsü aliba province tesemlen police temi temesepba mozü amshiba dak sentakba nung ken o 22,000 tashi angadangogo aser rehab nung mozü achir 67,000 tashi anioka yaridar, ta Xinhua news agency ajanga metetdaktsü.
China nung ozüng alema temesepba mozü mamshitsü yimyim ayimer yaküm küm pongu jungogo.
Yunnan province ya China nung temesepba mozü amshir timtiba aliba tesem lir kechiba süra anasa aliba Asia linüktem nung opium tsüner aser opium ya kidang mozü atema-a amshir.
Official osang ka ajanga ashiba agi, 2015 küm police-i apuba heroin aser methamphetamine ajanga linük nung item temesepba mozü noklang nung shilem 80 aser 70 tashi kümdaktsür.
Yunnan province ya China administrative division kübok nütsüng yongsük timba rongnung 12 buba lir aser mozü amshir timba aliba rongnung pongububa lir.

You must be logged in to post a comment Login