2015 küm Maharashtra nung aluyimer 3,228 soseta süogo

New Delhi, March 04 (Agencies): Yaküm Maharashtra nung aluyimer 3,228 tashi soseta süogo aser ibaji tesüiba küm 14 tsüngda aluyimer timtiba soseta asüba lir, ta tanü Union Agriculture Minister, Radha Mohan Singh-i metetdaktsü.

Aluyimertem timtem balala ajanga soseta asüba nokdangtsü atema Centre aser state sorkar napronglai scheme balala benoka inyakdar, ta paisa ashi.

“Maharashtra sorkar osang ajanga, aluyimer 3,228 soseta asüba metetdaktsüogo, aser ibaji 2001 küm nungi tenzüka yaküm timba lir,” ta Singh-i Rajya Sabha nung metetdaktsü.

Aluyimer timtiba asübaji Aurangabad nung 1,130, iba sülen Amravati nung 1,179, Nashik nung 4,59l, Nagpur nung 362, Pune nung 96 aser Konkan nungi ana liasü, ta pai ashi.

“Asür 3,228 rongnung aluyimer 1,841 bo senotsü teyari angutsü temsüa lir aser aluyimer 903 temsüa mali. Aluyimer 484 atemabo bushisüngdangtsü nüngdaker. Aluyimer 1,818 kinüngertem nem sen lakh kaka agütsüogo,” ta paisa ashi.

State nung tzünglu junga maruba ajanga aluyimba nung takoksa anguba atema taküm Centre sorkari sen crore 3,049.36 lemzüktsüogo.

Taoba küm ana tashi state nung tzünglu junga maruba ajanga aluyimertem kanga timtemteper.