2015 nung migrant nisung million 1 dak temai Europe nung jenok: IOM

Germany kübok Berlin yimti nung tentetba Berlin Office of Health & Social Affairs (LAGESO) kimalen migrant nisung noklang aikati pei tenüng züluoktsü asoshi tarensena nokdaka aliba noksa nung angur. (File Photo)

 Geneva, December 22 (Agencies): Taküm 2015 küm tenzüker tanü tashi nung pei linük toktsür Europe nung jenoker migrant nisung million 1 dak tema akümba osang ka International Organization for Migration (IOM)-i tanü Mongolbar nü metetdaktsüogo.

Tesüiba mapang, World War II (WWII) tongpang anenba sülen migrant nisungtemi Europe nung jenokba sülenbo tan mezüngsüa migrant nisung timbai Europe nung jenoker lir.

Africa aser Middle East na toktsür migrant nisung 1,005,504 dak temai ali aser tzü ajangdanga Europe nung jenokba osang bushiteta lir ta Geneva nung tentetba IOM teloki ashi.

Tan Middle East toktsür Europe nung jenoker rong nung küm 5 shi tejaklen nungi tenzüka mangatettep tulu adoka tongpang raraba ajanga nisung 200,000 dak tema tepsetba den külemi, nisung million aika pei talidak toktsütsüsa akümba linük, Syria migrant nisung tesadangka shi aliba aser tanüngba migrant nisungtemi tongpang raradak, Afghanistan aser Iraq refugee nisungtem lir ta par teloki shisem.

Greece linük kija nung migrant nisung 800,000 jenokba densema, migrant nisungtemi Europe kübok densemba Greece, Bulgaria, Italy, Spain, Malta aser Cyprus linüktem tonga aoba osang bushiteta lir.

Ano, North Africa aser Italy na tsüngda Mediterranean Sea ajangdangtsü merangdang migrant nisung 3,600 shi asüba mesüra samar mongutetba osanga bushitetogo.

Par telokisa ashiba agi, taküm Europe nung jenoker migrant nisung noklang shilem nung shilem 3 shi, nisung 35,000-i dang ali ajanga Greece aser Bulgaria na tonga aoba osang bushitet.