2015 PSU asayamong asayatsü tenzüker

Kohima, October 02 (TYO): Kohima kübok Christ King ground nung 2015 Pfuchatsumia Students’ Union (PSU) asayamong tanü Hokolbar nü tenzükogo.
Anogo 2 agia asayatsü ayongba asayamong tenzükba sentong nung Kevidezo Peter Rutsa, Tir, Northern Angami Youth Organization (NAYO) tongti tesemdanger liasü.
“Asayar shiai pei shilem agiba asaya nung bendanga agüja yimya tajungtiba nung shilem agitsü ajungshir. Ano, PSU-i iba asayamong ayongba atema par tentet nem tenüngsang agütsür,” ta tongti tesemdangeri ashi.
Kohima Village Youth Organization (KVYO)-ia taoba küm ishika tejaklen nungi tenzüka yimtsüng balala rong nung saisapong sentong balala ayongba atema pelaba olen ka metetdaktsüba den külemi, yamaji inyakba ajanga Kohima kübok tentetba yimtsüngtem nungi asayar tajung adoktsü imalaba olen ka pai metetdaktsü.
“Tan asayamong nung takok angurtem shimteta parnok P.Khel tenüng nung taruba 2016 küm January ita 5-9 nü tashi asayatsü ayongba 62 buba Kohima Sports Village Meet nung shilem agidaktsütsü sentong lir. Ano, taküm December ita 19 nü PYO Athletics & Wrestling Meet lir anungji, asayartemi renemshia alitsü ajungshir,” ta PYO Tir, Vimhalie Pienyu-ia tanü sentong nung metetdaktsü.
Tebur aser tetsür shilem nung Badminton, Basketball, Table Tennis aser Volleyball; Open shilem nung chess aser tebur shilem nung Football tetoktepba densemba asayamong nung Juvenile Club, Light Club, Phoenix Club, Seasons Club aser Tsiekedi Club nungertem densema telok 5-i shilem agitsü tenzüka lir.