2015 UNHCR Nansen Refugee Award atema Afghan refugee tsür ka shimmer

 

2015 UNHCR Nansen Refugee Award sempet agütsütsü atema shimtetla, Pakistan nung jenoka alir Afghan refugee tsür, Aqeela Asifi-i UNHCR ketdangser ka den tanü Pakistan kübok Kot Chandana refugee yimtsüng nung ajuruba noksa nung angur. (Kot Chandana, September 15)

Islamabad, September 15 (Agencies): Pakistan nung alir refugee tetsür chanutem nem kaket shisatsü agütsütsü asoshi taküm bendanga agüja inyakba Afghanistan refugee tsür ka nem 2015 United Nations High Commissioner for Refugees (UNHCR) Nansen Refugee Award agütsütsü renemogo.

Senotsü aser tesayutsü osettsüset peria meliaka, lar Afghanistan toktsür kidangsüa aliba Pakistan nung jenoka alila, arishi küm 49 tain aser tanur 6 tetsü, Aqeela Asifi-i Pakistan nung jenoka alir refugee tetsür chanutem nem kaket shisatsü agütsüba nüngtem nem la iba sempet ya agütsütsü asoshi shimtet.

Asifi-i Pakistan’er Punjab province kübok Mianwali district nung tentetba Kot Chandana refugee yimtsüng nung alir tetsürchanutem nem süki ka nung kaketreju tenteta parnok nem kaketshisatsü agütsüba osang bushiteta lir.

Asifi-i küm 23 tejaklen nungi tenzüka tanü tashi nung refugee tetsür chanu meyirijang jenti nem kaketshisatsü tajung agütsüba osanga jangjaogo.

“Ni Pakistan nung jenokba refugee tetsür chanutem nem kaketshitsü agütsüba ajanga ni iba ama sempet tulu agizüktsübo kodanga mepungmangi liasü,” ta Asifi-i temulung shiranga ashi.

“Pakistan nung Afghan refugee nisung million 1.5 shi jenoka lir aser parnok rong nung tesadang kabo school-i aotsü mapang atongba tila taurtem lir. Ajisüaka, item tila tanur noklang nung shilem 80 shi kaketshisatsü bushitsü maongka monguteti lir,” ta UNHCR-i metetdaktsüogo.

1992 küm nungi tenzüka Pakistan nung lar kibong den jenoka alila, Asifi ya Kabul nung alidanga tesayur ka liasü.

Asifi-i mezüngsüa tentetba süki school-ji tanübo lungki küma tajungba küma yanglushir külen idakji kaketshir meyirijang ka dak tema nem kaketshisatsü agüja aliba osanga bushiteta lir.

UNHCR, district sorkar aser Non-Governmental Organizations (NOGs) nungeri nungita yariba ajanga tanü iba jenjang tajungji nguteta lir.

Pei talidak toktsür bendanglen jenoka alirtemi pei taküm tenla nüburtem taküm jenjang tajungba kümdaktsütsü asoshi balaka inyakertem nem UNHCR-i iba Nansen sempet ya kümshi agütsür.

2015 UNHCR Nansen Refugee Award sempet ya Geneva nung taruba October ita 5 nü sentong tajunga ka agia Asifi nem agütsütsü renema lir.