2016-17 küm National party pongui sen billion 3 ajangzük

New Delhi, Tsüklai 08 (Agencies): 2016-17 küm National party tenet nungi party pongui sen billion 2.99 dak tema ajangzüktetba sangdongogo aser sen timtiba arubaji BSP party dangi sen billion 1.73 aruba liasü, ta Association for Democratic Reforms (ADR) osang ajanga metetdaktsü.
Ano party tenet nungjagi party ana- BJP aser Congress natibo tang tashi ECI nem audit report agüja mali; iba osang agutsütsü atema mapang atakzüktsüba süir ita asem jungaka party anati iba osangji magutsü, ta tanü kasa sangdong ajanga metetdaktsü.
Audit osang agutsütsü atema national party tem nem yaküm October 30 anogo tashi mapang agüja liasü.
Bahujan Samaj Party (BSP), Communist Party of India (Marxist) (CPM) aser All India Trinamool Congress (AITC) party temibo mapang shidak nung audit osang ji agutsü, Communist Party of India (CPI)-i anogo 22 menor osang agutsü aser NCP-i ita ana dak tali menor Aenjeti 19, 2018 nü iba osang agüja liasü.
2016-17 küm income timtiba aruba party ji BSP (sen billion 1.73) liasü aser tanabuba nung CPM (sen billion 1) liasü. Ano National party pongu nungjagi income ishitibaji CPI ( sen million 20.7) liasü, ta kasa osang ajangasa metetdaktsü.