2016 Arangtet Tatidang takok ngua agiogo

Mokokchung, Oct 11 (TYO): Oct 8 nungi tenzüka anogo asemnü Ao Senden Literature Board (ASLB)-i achayanga agiba Ao Arangtet Tatidang (A.T) 2016 Mokokchung, Dimapur aser Kohima centre-tem nung takok ngua agiogo.
Taküm centre asem nung Arangtet Tatidang agütsür ajak agi 183 liasü. Tatidang agütsür noklang shilem nung 75% bo tetsür liasü.
Centre-temji; Mokokchung nung Jubilee Memorial School (JMS), Dimapur nung Mission Higher Secondary School aser Kohima nung Chandmari Higher Secondary School nung agi.
Course iba amai lemsar agi; PU level nung 101, 102, 103, 104 & 105 (paper ana), Graduate level nung G 101, G 102, G 103 (paper 3), aser Post Graduate level nung 601 aser 701 (paper 3) liasü.
Arangtet tatidang ya tongtibangsa Ao oshi zülumen lirumedemba den pei tetsü oshi wazüka ayutsü nükjidong yur taoba 2006 nungi tenzüka taküm agi 11 buba agia arur.
Tang agiba tatidang ya taruba November ita tatemlen result agütsütsü merangtsü, ta ASLB tezülur Wb. I.Temjen Tzüdiri metetdaktsü.
Anogo asemnü tatidang agiba mapang centre asemprong nung tanüker (invigilators) aser teyariteper shirnokisa nübu den shisatsü agi yaritepogo, parnok ajak dang pelaba, Tzüdirisa lemsatep.