2016 Assam Assembly Election mezüng shilem nung candidate 586 tokteptsü

Guwahati, March 20 (Agencies) : Assam nung constituency 65 atema April 4 nü Assembly election mezüng phase nung tokteptsü atema nisung 599-i tenüng agütsü, ajisüaka parnok nisung 13 tenüng magizük, anungji tenüng agizüka alir candidate 586 iba election nung tokteptsü, ta Assam Additional Chief Electoral Officer Gaurav Bothra-i Guwahati nung osangbenertem senden ka nung ashi.
Tang shima alir aser meshimi alir candidate tem tenüng züluba tejangjaji district shia nungi tangang arudar anungji asüng tashi nungang candidate tenüng metettsü, ta pai ashi.
Assam Assembly menden 126 atema election tanabuba phase ji April 11 nü constituency 61 nung agitsü. Tang tashi nung item constituency tem nungi tokteptsü atema candidate 35-i tenüng angüja lir.
Election nung shilem agitsü atema tenüng agütsütsü osang ya March 15 nü metetdaktsü aser March 22 nü tashi dang sürbo joko tenüng magizüktsü.
March 24 nü tenüng agüja alirtem asadanga shidangtsü aser metoktepnertem atsüngtsü asoshi March 26 tashi mapang agütsütsü.
Constituency ajak atema vote May 19, 2016 nü azüngtsü.