2016 ICC World T20: India o Pak na Dharamsala nung ajuruteptsü

Mumbai, December 11 (Agencies): Sangküm 2016 küm March ita 11 nü nungi April ita 3 nü tashi asayatsü ayongba ICC World Twenty20 (T20) cricket asayamong nung India telok Pakistan aser Australia na den kasa telok nung densemogo.
ICC-i iba asayamong indang group aser asayadak temelensa osang tanü Mumbai yimti nung sangokja liasü.
India teloki mezüngbuba asaya New Zealand den taruba March ita 15 nü Nagpur nung asayaba sülen, Pakistan den Board of Control for Cricket in India (BCCI) Secretary, Anurag Thakur alidak, Dharamsala nung sangküm March ita 15 nü ajuruteptsü lemzükogo.
Defending champions, Sri Lanka densema, tan asayamong nung telok 16-i shilem agitsü renema lir.
Test cricket asayaba linük 10 den külemi, linük tanga nung tentetba telok 6 lokteper tan agi World T20 asayamong tanabuba asayatsü renemer lir.
Iba asayamong nung takok anguba tebur telok nem senpet sen dollar sen million 5.6 aser tetsür telok nem dollar sen 400,000 agütsütsü renemogo.
India kübok Delhi aser Mumbai na nung iba asayamong indang semifinal asayatsü aser Kolkata kübok Eden Gardens nung final asayatsü renema lir.