2016 Khristmas tayongzukba

– R. Imkong Lkr, 4th mile, Diphupar

Khristmas benjong mongpu arur, asenok nisung shiai iba Khrista asoba benjong ya kechi koda agizüktsü renemdar?
Yangji tasüngdangba kar yamai agütsür Yisu ya shiba ? Pa ya kechi komala nisung aser koyimer? Koba lima nung Pa asü ? Pa ya alima kümtetdakba ta ajar, alima sanger atema Pa ya onsara teküpboktiba jenjang ka nung aso. Tsüngremi Pa ajaso chir ka tang aliba alimai yokba ya kechi nükjidong nung yok ?
Yisu ya alima meyangludang yongi liasü. Pa ya tebu sentsüwangshiba amaji paa kasa sentsüwangshi nung kotak nung tebu den liasü. Iba alima sanger meimchirtem ya ka sülen ka ta jakzükyonga aruba temeshi laishiba ajanga jangja jangja I PUtipuyang tapu ka nungi tatongi angutsü aser ano osangtajung Mathi tapu ka nung Abraham jabaso Dawid pa jabaso Yisu Khrista jakzükdak kidong otsü ta shia angur. Asenok alima sanger otsü nungbo shiba nungi shiba jakzük tadongi ka sülen ka ta züngshia aru. Saka Yisu Khrista yabo mezüng yongi tebu den kotak nung liasü. Saka pa ajanga alima temenen pur kümzüktsü asoshi alima sanger yimya nung temeshitsür Mari ajanga alima shi kümer aso. Shidakba agibo Yisu atema tebu Yosef ya rabir ka lir (step father). Kechiyong Yisu ya tetsü nu menden nung temeshi tanela ajanga among, aser takoksang Tsüngrem nungi lir. Aji oda Abraham nungi Yisu Khrista asoba tashi nung putu 42 (lir ser ana) bubai ayaoka aitdang kümtetdakba Yisu Khrista ya alima nung aso. Mathi 1:17.
Yisu ya kanga ajemaluba aser tila akümba Tsüngrem chir agi nisung akümba liasü. Pa ya kotak tebu menden nungi alima menenpur kümzüktsü asoshi tebui yok. yamaji Pa Tsüngremi chir liaka nisung shi nung aso. Pa ya alima otsü nungbo Nazareth nunger liasü aser Bethlehem yim nung aso.
Aser Pa Tsüngrem mesüka liaka, Tsüngrem den saku alibaji sota ayutsü tim ta pasasa mezüngshi. Tetezü Pa ya tebu Tsüngrem ama tashi tulu aketba, oda sentsüwangshi nung liakasa, Pai aji khenyongi mezüngshi. Saka alima sanger temenen nung samaa aliba kümzüktsü asoshi Pa taküm rangpen bendanga agütsür alimai aru. Filipi 2:6-8.
Yisu Khrista alimai aruba nükjidongji tatsüba agi yamai rasaa ashitsü akok.
1. Iba lima nung sensaker tajemrepba tia nung alirtem mesotsü aru.
2. Iba lima timtem tekangshi talenba tia nung alirtem aniteta nüchi tia ngudaktsütsü aru.
3. Aser temenen nung samaa alirtem kümzüka kotaki anir atutsü atema aru.
Iba timtem, tekangshi lima nung ya sensaker, lajamenjar lenimaor asoshibo masoang tajungba süla ta aikati bilemer aser shisadanger. Saka Tsüngrem nükjidong ka lir. Ibaji kechi ta aikti bilemdanga alitsü südi, iba lima nung ya takar (rich people) tulur, tashitemeteter agi sünga lir. Aser parnok ya tendangtsü asoshi sensakertem, lajameret tem leni maortem, mata mapensartem ya yanglu ta metetangma. Ashi shibaibo timtema linütsü ?
Taküma 2016 Khristmas mongpu arur aser takartem, tulurtembo kechi chir kechiang machi nangdena bendena yur, kari talongtsü nung sentsüpranga sübuteper senzüteper. Kechiyong parnok kibongtem nung kecha tanüngtsü maka aser kanga kecha sentsüwangshia liteter. Saka ajiang kar kibong nungbo tanep chi sorutsüa mali, oda abensuoshi alitsüjibo doktsür tebilemtsü agi sünger alidang, taochi makaba takartemi ita sen tera ngua aliba tu Bank tashi arua kima tu ataa alir aser sentsüh tsüa aliba atema tu ita sen ajak okshia razüka bener aor aser ano tagütsütsü anünga aliba atema tu O tesüngmangtsüka shir oadoker. Saka tetsür tanurtembo tebu atutsü yongyaseta ataa aliba tu ki atongdangbo teka tazüng ser tejak tu paklak paklaka kümer ayatsüra nung lula lula kümer anarongdena pei ki tu tongteter aser tanurtem tetsüi koda ta asüngdangtang kechi ola madoki ajepzüka amener. Aser Khristmas amongtsüba tu kecha ashitsüa mali teimla ajak samadoker alir. Yamaji item amala kibong asoshibo Khristmasji tejashi X mas akümer. Saka tulur takar tembo Khristmas shijep tululu agütsüteper aser amtsük amsong (cake) tajungtiba temtu alia Khristmas gift agütsüteper, koda jangratemtsü. Saka item amala kibongtem nungji Yisu Khristaji mesoteter saka leni-maor kibong nungiang kümtetdakba Yisu Khristaji sodoktsür. Halleluyah! iba taküm otsü atema amangba pur ajaki pelatepdi arung.
Asenok ajaki ya rajema metettsü kanga nungdaker, oda amangba pur shiai pieji Khristan tajung kaka tabo tangar dang sayuner, saka mapa agibo mesayuteter. Kechiyong yangi ni takartem ajak ta mashir, saka aikati sensaker dang nungi sendem tali tali agir aser Khristmas mongpu arua Khristmas atongdangbo kangasa jaksajaklema sayuteter, oda sensakertem dang temeim khen agi mesayui jangratema benjongtepba angudang onok tiamakartem temulung kanga kuremdaktsür. Repranga ataa liang, kenu anogo iba tajangzük ya nai meyipa ngulanglang ta shia atar. Kechiyong temeshi laishibai yamai ashir. Amos tapu 8:4,5 ya angang o nenok mekokmeiner meyokertem aser linuk nung sensakertem tamakok ngudaktsürtem, Ifa tajemba aser jenjangbo tali kümdakja aser shekel tuluba kümdakja, aser seret teyazü agi külaka asenoki yoktettsü asoshi kodangang mendi ayoktsü, ita tasen aser tsük ayoktsü asoshi amungnü süitema aotsü. Yamaji takar aikati sensakertem dang taochi temeim mesayui, onoki sentem agitsü onok dak dak temeten lir ta ashir. Anungji asenoki taküm ya medembangdangsa iba tetemlokji teyanglur nungi angutsü renema atatsüla. Oda tia maka sensakpu tia ajuru nungji jangpong tazüng aser aonsotsübo maka ta alidang temeimer kari janga seret 5, kari seret asem, kari seret ana, kari metsü-mersü alitsü sen noklang ka, kari tenem ta agütsüba nungi aonsotsü tera alia yur, aser Tsüngrem tenüng sanga asüng atema tebilemtsü melii anisüngzüka mejanger. Aser tang ya Khristmas mongpu asünung aiür-asangurtemibo par tiaji memeteti donation meshiyonga arur, aser tetsüi anarongdena Khristmas tenla abentsü ta ser aonsotsü alidangtu sen metsü anüngzüka yua akabato kechianga mashiji ibato agiteta agütsür. Saka tanü lanurtemi aji agi tenük masünger, kechianga meshika! Aser kazüyonga tanurtem medemertem arur nema tzüang marok kaka lema agütsür, kechiyong pari amtsük amsang (cake) agütsünüaka par atema aji pungmang nunga mepongmangsemer aser süngo tanang jemdaktsütsübaji otsü mali akümer, anungji kanga aakseta oda tenük nungi nüktzü memeteti alua atar. Saka kodang Khristmas to tonga arur jang tera aliba tu soroa yur anepdang chiyungdang aon maliji süngmok tu metsü ajena nangnanga shiyungteper senshir.. Saka aonungbo sotzü marok kaka yonger mejanger aser ano Khristma tendi nü tu tetsüi chi mesüng mesünga soruteter aliba den tu mersü tajem tu kaka amer mersü nung ajena khreb khreb ta nguzüka asentsü alua chiyungteper. Saka iba Khristmas benjung nung anema lia taküm tajung agi tongteta pelateper, ya koda jangratemtsü taküm aser ibajiang Khristmas shitakbaji lir. Saka takartem, tulurtem aika shi tajung peria sua yur iba denji mechiyungteter, kechiyong parnok temang agi memelar. Anungji pei kidang kechi aka aji agi tenük sünger Tsüngrem tenüng sanga lidi ni ta ajak dang ayongzüker. Amen.