2016 küm Adele-i million £40 aazük

May, 04 2017 (Agencies): Adele-i la indang kensep ’25’ ayokba aser alima ajunga sema kentena senzüba sentong nung sen aazükba meyokteper ita 12 tsüngda nung la rongsen million £85 nungi million £125 kümogo. Yaküm küm tsüngda nung la rongsen million £40 agi timba aküm.
Sunday Times newspaper’s annual wealth survey ajanga sangdongba agi, Adele ya alima nung tetsür musician rongnung takartila lir, saka Britain nung musician takartibatem sükdangba rongnungbo la jenjang 19buba nungang lir. Tang Britain nunger musician rongnung takartibaji Sir Paul McCartney lir.
Beatle telok nung züngsem, Sir Paul McCartney indang rongsen ajak meyokteper million £780 shi lir aser taoba ita 12 tsüngda nung pa rongsen million £20 dak tali renlok.
Iba sülen tanabuba aser tasembuba jenjang nung Lord Lloyd-Webber aser U2 lir. Parnok rongsen million 740 aser million £548 ta lir.
Iba tarensen nung Sir Elton John jenjang pezübuba nung lir. Pa ket nung rongsen million £290 lir aser pa sülen Sir Mick Jagger jenjang pongububa nung lir. Pa ket nunga rongsen million £250 lir.
Adele ket nung tang tashi nung rongsen million £125 lir. La alima ajunga nung ketenba sentong 122 nung shilem agiba ajanga Box offices nung sen million £138 shi aazüka liasü.
Arishi küm 28 tain kentener-i taoba mapang Wembley Stadium nung kentenba sentong 4 tashi knga takok ngua agi, saka lai la tarutsü nung kentena senzüba sentongtem nung shilem agitsü asoshi mejangjaba lemsateba liasü. Aji ta süra tarutsü nung la rongsen aatsü asoshi maongka kanga ajema akümtsü.
New Zealand, Auckland nung kentenba sentong ka nung, sentepa aliba lokti den jembidang lai la sapurtem mechi nung kentenba sentong ayonga shilem agia senzür ta ashi.
“Nenok mechi nung dang ni kentena senzür aji mesüra linük balala sema senzütsüba ya kü asoshi kangabo tapet masü,” ta lai lemsatep.
Aji saka la alima ajunga sema kentenba sentong nung shilem agia senzüba ya la career nung takok tulutiba lir, ta ashi. Lai maneni item sentongtem ajanga la taküm melenshidaktsüba lemsateb.