2016 küm gari lendong balala nung anogoshia nisung 413 asü

New Delhi, September 07 (Agencies): 2016 küm India nung gari lendong shilem 4.1 ajema liasü, ajisüaka nisungbo shilem 3.2 agi timba asü, ta Road Transport & Highways  Ministry-i metetdaktsü.

2016 küm linük nung gari lenmang nung lendong 480,652 atalok, aser item lendong nung nisung 150,785 asü aser nisung 494,625 yirua liasü. Iba tetezü India nung ghonda shia gari lendong 55 shi atalok aser ghonda shia nisung 17 shi asü.

Iba jakdang 2015 küm nung India nung gari lendong 501,423 ben atalok aser item lendong nung nisung 146,133 asü.

Item gari lendong nung asürtem shilem 83.3 bo arishi küm 18-60 tsüngdapurtem liasü, ta ministry osang ajanga metetdaktsü.

Road Transport & Highways Union Minsiter, Nitin Jairam Gadkari-i, “National Highways nung dang masü saka state highways aser district lenmangtem ajak nung gari lendong ajema akumtsü atema onoki inyakdar. Ni state sorkar ajak dang gari lendong ataloktsüsa aliba tesemtem nung CRF indang senotsü shilem 10 amshia inyaktsü tuyuogo,” ta metetdaktsü.

“Iba dak alia district ajak nung Road Safety Committee tentettsüla, aser ibaji MP leniba nung Deputy Collector, Secretary shima tentettsüla,” ta paisa ashi.

Minister-isa, “Taruba küm ana tsüngda tashi nungbo gari lenmang nung lendong shilem 50 ajema akumtsü nükjidong lir aser Parliament nung Road Safety Bill agizükra ibaji ajanga tuluka inyaktettsü,” ta metetdaktsü.

2016 küm gari lendong atalokba telemsaji yamaji liasü: Lendong shilem 33.8 bo two wheelers lendong liasü, gari tila, jeep aser taxis (lendong shilem 23.6), trucks, tempo, tractors aser gari tulutem (shilem 21), Bus lendong shilem 7.8, Auto-Rickshaws lendong shilem 6.5  aser tanga motor vehicles lendong shilem 2.8 liasü.

Kasa osang ajanga ashiba agi, 2015 küm two wheelers lendong shilem 28.8 dang liasü saka 2016 kümbo shilem 33.8 akum.