2016 küm ya koma ka süidaktsütsü sentong lir ?

~ L. Kika Pongener Aoyimküm, Dimapur.

Meyi ana ser ter pongu küm süitema oadokogo,aser küm tasen ka meyi ana ser ter terok küm nung asenok ayaokogo. Küm tasen nung ayaokdang nübur ajunga mulongjang nung taküm küm ya-a koma ka süidaktsütsü ta asüngdanger aser yamaji nübur aika nükjidong tajung aser sentong tajung yanglua yur ibaji ataloktsü arishia meranga inyaker. Ajioda, kodang asenoki tarutsü nükla mangdang kar yur inyaka aotsü sentong yangludir, idangji tamasa tesüiba küm inyaka aruba khen meyipa reprangshitsü kanga tongtipang, aser tamakok kar lira kechi kuli ajanga tamakok angu, aser takok ngua inyaka aruba kar lira ano tali tajungba inyaktsü asoshi nükla tajung, sentong tajung yanglutsü kanga tongtipang. Anungji asenok ajaki taoba meyi ana ser ter pongu küm asen sorkar, yimten, mungdang & arogo, aser loktiliba koda lia aru ta khen meyipa reprangdangdi.
Sorkar inyakyim : Taoba küm asen Naga lima sorkar küm tetenzük nungi tatartem parnok tsüngda nung telemsa adoker tejep-tesüng mekümteti ita ishika lia aruogo. Ajioda süaka lia lia ano opposition maliba sorkar-ang ka yanglutetogo. Ajisuaka iba süngjangji tajung atangtsü asü tamajung ka tangtetdir taküm 2016 küm nungi inyaka aodang tali tejangjaba metettsü, saka opposition maliba sorkarji tesüiba mapang congress party rulling mapanga ajangshia aruogo, aser tajung asü tamajung’ar menakdanger-ji asenok ajaki metetogo, aibelenyongjia anema nokdaker maliji ashiko kangarabo tajungbabo masütsü südi. Ano iba denji centre sorkar nunga Planning Commission tenüng aser inyakyim tasen melenshiba ajanga sanction tasen kecha magutsüba agi terenlok mapa sadema meinyakteti küm süitemogo. Aser küm ishika tejaklen MGNREGA Scheme ajanga terenlok mapa aika inyaka aruba yaküm küm iba scheme nungi senotsü kecha maruba agi terenlok mapa aika meinyaktet aser tongtipangsa yimdaklirtem ayangdak lenmang kecha maka okrongseta küm temdaktsüogo. Iba MGNREGA scheme ya centre sorkari meyoker asü, State sorkari pei tata percentage magütsüba ajanga soita ayur asü mesüra senbo yoker sernung state sorkari tanga lenmang nung amshia-doker meinyaker’ar ibajibo sorkar tazüngpurtemi dang tejangja shitettsü. Ano aji dang masü school tesayurtem itasen mapang shidak nung magütsüba,kaketshirtem nem scholarship mapang shidak nung magutsütetba ajanga bendanglen azünger kaketshirtem karbo institution toktsür meyipa arutsüsa akümba, iba amala tensa tia aika ajangshia aruogo. Anungji taküm 2016 küm yabo o agi jembiba,yimyim ayimoktsüba mesüra nangzüker meinyakba sorkar masü saka terenlok mapa asangsang nung mapa küma inyakba küm ka südaktsüdi.
Yimten yimsüsüba : Asen Naga lima nung yimten yimsüsüba taoba küm koda inyaka tenzüka aru ta khen meyipa reprangdangdi. Sorkari asen lima terenlok asoshi agutsüba sen timi ochishia ketdangsua inyakogo ma ? Asen lima lenmangtem koda lir ? Mozü kitem koda kar ? Schooltem junga lir ma ? Electric light shidak arudagi ma ? Sorkar mapa nung tenzüktsü tasen shimyim nung subokrem amshia tezülen nungi shimteter asü mesüra indang indanga inyakyim shidak nung shimer ? sorkar mapa nung küm aika tenzüka arur pension angurtem nem par tim tangutsü mapang shidak nung agutsüdar ma ? Yimtsüng nung yimsüsürtemi tashiyim mamshii tulur tilar mebendangi ochishia yimsü süa aruogo ma ? Linük tenzükertem nuchiso bushirtemi nubori tamang katetsüsa liteta aser inyaka aruogo ma ? Centre sorkar o NSCN (IM) tsüngda tatempang telemtetba tajung ka atema sign sütepbaji asen Naga nunger atema tarutsü nükla tajung telemtetba ka asütsü nubur ajaki imlaa atadagi, ajioda nubur ajaki iba asoshi tekaratiba nung tatempang telemtetba tajung agitettsü asoshi ajongshiteptsüla, shisa agutsütsüla, kenpang-opang ka asütsüla, aser Naga nunger kin ajunga nükjidong ka dang asütsüla aser tanüngba telok nujiso bushir linük tenzükertemi-a tajung tebilemba nung telemtetba tajung agitsü nükjidong asütsüla, aser ajioda ibaji ataloktsü atema nuburtem ajaki lumia sarasadema nungittsü kanga tongtipang. Ajioda taoba küm tenzüka arudang tashimait metokmeperi kar danga inyaka arua lira taküm 2016 küm yabo meyipa reprangshir tajungba yanglushia inyakba küm ka südaktsüdi.
Mungdang & Arogo inyakyim : Mungdang aser Arogo lenirtem taoba küm inyaka aruba nung Tsüngrem tsüngdang sentsüh-tsür asütsüsa tashimait kar danga inyaka arua lira meyipa reprangshidi. Arogo rongsen ketdangsüba nung lalushipong mesüi Tsüngrem-ia hau ta shitettsüsa ochishia inyakogo ma ? Arogo terenlok mapa kisüng nung rangloker inyakdang tanelar mapa kar danga senzüka tokja lira meyipa reprangshidi. Kechiyong Khristar arogo ka teinyaktsü tongtipangbaji sama-a aliba kintem, nütsüngtem aser temenen purtem Khrista dangi anir arutsüba, ibalaji-ang tongtipangba. Mungdang aser Arogo inyakyim balala nung telemtetba agidang kanga junga meshisadangi telemtetba agiba ajanga arogo pur, amangba pur kar danga temulung yirudakja, metsütakdakja ali asü (?) ta khen arokaroka shisadanga meyipa reprangshidi. Tanü asen Naga nunger arogotem ajunga alima lokti tentet ka tang mesüka kümadokogo (Liberal). Arogotem nung Yisu Khrista jakla aser noksa alima nem moksepdaktsüdagi. Tanü arogotem tia telung tashi anguoka reprangdangra project tuluba tuluba mekazüka inyaktsü, budget teimba teimba yangluteptsü, saka youth ministry aser Christian education ministry Sunday school aser child senzüka toktsür, iba ministry nung senotsü intoktsü kurur. Ajisuaka tarutsü putu arogo, yimden , loktiliba aser sorkar bener aotsü purtemjibo iba ministry nungjagi dang adoktsü. Aser budget crore-sa crore lakh-sa lakh intoka project tulu-lu inyakba ajungaji iba tarutsü teimla lanurtem ya raksara amajok dang asütsü. Ajioda tanü alima ainba den liromedema aotsübaji-a tongtipang, saka youth ministry aser Sunday school aser child ajak dang nungi tongtipangba ta suoki ia bilema senotsü intoktsü mesasatsüla. Ano aji dang masü tanü arogotem ajaki lanur zünger mapa mangurtem (Educated unemployed) aser züngpet-züngrar (Drop-outs) item asoshi-a sentong karbosa yanglua budget nung inoka senotsü terarabosa intoktsüla. Anungji arung iba 2016 küm yabo inyakyim tasen kar melenshia inyaktsü merangdi aser toklang tenzükertemi anir arogo nung tenzüker & tenzüklatem ajaki pulpit nung dang nokdaker Tsüngrem o sayuba küm masü, saka kibong kibong dangi tsüngdong kipoksema orr Tsüngrem o ashiba küm ka südaktsüdi. Tanü asen Naga nunger arogotem sen crore-sa crore intoka tenlaki tulu-lu yanglua yur sentepi arur mali, ya kechi tashimait ta bushidangtsüla aser arogo nung toklang tenzükertemi anir tenzüker & tenzüklatemi peipei arogo sasep nung inyakyim tasen kar melenshia inyakdangtsü kangasa nuüngdaka kümogo. Anungji pulpit nung nokdaker sayutsüngiba yagi teperi-a ta mebilemi khen awa-a oa kipok tonga tsüngdong orr Tsüngrem o ashi nungang ajungtsü südi ta bilemer.
Loktiliba : Asen Naga lima loktiliba ajunga taoba küm lia arudang koda lia aru khen meyipa reprangdangdi. Tanü putu nung asen Naga nunger lokti tentettemji züngdangra mezüngmatsüsa tentetogo, kin kin telongjem (Hohos) kin o kin tsüngda telongjem, lanur telongjem, watsütem telongjem, laishirtem telongjem,laishirtemi tenzükba non-profitable society balala aika dang lir. Item lokti tentettem ajak nükjidongji kechi ? Lenir, tanishir aser tekolak menden agi atatsü mechi nung tenzükba asü ? Sarusaji sarua lenir kar tajangzük agitsü nüngdem nung tenzükba asü ? mesüra Saru-saji sarua bendener benjong ayongzüka chiyungteptsüba nükjidong asü ? Ajioda lokti ajungaji nükjidong tajung kaka yur tenzük süra ibala mangdang aser nüklaji tongteta inyakdagi ma ? Tongtipangsa laishirtemi lapokba/tenzükba non-profitable society-tem aser ministry aika dang lir,aser item ya teimba ka bendanglen nungi telok balala nungi senotsü teyari agia lapokba/tenzükbatem lir. Ajioda item telok tentet ajunga jagi kechi nungdem nung bendanglen telok balala nungi senotsü teyari agir parnok nükjidong aser mangdangji tongdakja abensaa, Tsüngrem tsüngdang sentsühtsür masütsüsa ochishia inyakdar ma ? Yimten dak sendakba lokti tentettem (NGO) pei pei nükjidong abensaa nübur tajangzük akatsüsa inyaker asü mesüra nükjidong tajung tu tesülen toktsür political party kar tenya-ashi-angar kümer rongsen dak rangloker inyaker asü ? Tanü asen Naga nunger lokti ajunga yareta shirangba tashidak tulutibaji tenükmerem, tarishitep, tetsükchitep, tajung mereprangtetba, mapa tajung nung junger ta tenüngsang magutsütetba, tamajung nung tang tamasa ranglokba ibala (Negative attitude) jakla yimya yagi tanü asen lokti ajunga rahjang küma shirangdaktsür. Anungji taoba küm lia arudang itemla mesukba tashimait mokokmin kar danga inyaka arua lira intokdi aser iba 2016 küm yabo meyipa reprangshir teyanglushiba küm ka südaktsüdi.

You must be logged in to post a comment Login