2016 küm ya Naga yinten asoshi tongtibang küm asütsü : Yitachu

Kohima, Jan. 06 (TYO) : 2016 küm ya Naga yimten tebilemtsü ken o nung telatetba kati arutsüa akok, anungji Naga nungertem asoshi tongtibang küm ka asütsü ta Nagaland School Education & SCERT minister, Wb. Yitachui metetdaktsü.
“Naga yimten tebilemtsü ya tatem kati arua latettsü takoktsü lenmang lir saka iba telatetbaji mapa küma inyaktsü atema Naga nunger ajak ajungtsü bilema asenoki inyaktsü nüngdaker,” ta Yitachuisa metetdaktsü. Pai iba o ya Phoyisha Cultural Organisation (PCO)-i ayongzükba Phoyisha Cultural Festival sentong nung jembidang metetdaktsü. PCO ya Phek district nung Meluri sub-division kübok yimtsüng ter telongjem tentet ka lir.
“Asenoki Naga yimten tebilemtsü ya linük tenzüker telok balala akümba mesüra kin indang bilema latettsü memerangtsüla saka kechi telatetba südir süaka Nga nungertemi agizükteta mapa küma inyaka otettsüsa telatetba ka asütsüla,” ta paisa metetdaktsü.
” Asenoki iba tangatetba nung inyakra, Naga yimten tebilemtsü ya koktettsü saka asenoki asen ajungba asaa asen telok mesüra asen kin ta bilemdir, iba jagi telatteba kati marutettsü,” ta paisa ashi.
Iba benjongmong sentong ya küm ana nung ken alir aser iba ama sobaliba benjong ayongzüka akaba ajanga taintemi lanurtem nem sobaliba senmang tajung agütsütettsü ta paisa ashi.
Kasa sentong nungsa jembidang, School Education Minister, Yitachu-isa ashiba agi, Nagaland nung tazünger aser tashitemetettertem aika liaka tebilemtsü tuluba akümba kuliji asenoki ochi mejembir aser ochishia meinyaker, iba jagi asenoki metetba ajanga alima tebilemtsü koka meinyaktetter.
State sorkaribo school ajak nung tesayurtem tajungtiba agütsür asünungji , yimtsüng aser mepu shia nung Ecucation Committee-i junga inyakra sorkar school ajak alima nung taungtiba school küma otettsü ta Yitachuisa metetdaktsü.
Phoyisha Cultural Organisation (PCO) kübok aliba yimtsüng terji – New Phor, Phor, Wuzu, Hutsü, Yisi, Küzatü, Shatüza,. Weziho, Mollen aser Yisisotha yimten lir. Item yimtsüng ter telongjemi küm ana nung ken sobaliba benjongmong sentong ayongzüker aser iba sentong nung tsürabur ken, yartsüngsang aser saisapong balala nung toktepa shilem agir.