2016 MDFA asayamung meraketa tenzükogo

C. Apok Jamiri 2016 MDFA asayamung tenzüktsüdang tangokba noksa nung angur. Mokokchung, Oct 4, 2016.

Mokokchung, Oct 4 (TYO): Parliamentary Secretary for Tourism (GoN), Wb. C.Apok Jamiri Mongulbarnü yangi Imkongmeren Sports Complex Mokokchung nung rostrum tasenba lapoktsüba den 2016 MDFA asayamung meraketa tenzüktsüogo. Mokokchung Town Baptist Arogo Associate Pastor Wb. Yanglu Pongeneri rostrum meshitettsüba den asayamung asoshi temoatsü meshia sarasademtsü.
Tongti tesemdanger C.Apok Jamiri iba sentong nung jembidang, ‘saisapong ya alima kini mulunga agizükba, yimjung, terenlok aser telungjem adokdaktsüba luyim ka lir’, ta ashi.
Saisapongba aser kentenmenü ya Naga nunger dak keta lir, anungji, südoksünemtsü (entertainment) atema dang masü, saka asenoki temulung agütsüra nisung ka taküm nung ibai mapa ka ama shimtsü lenmang lir, ta paisa ayongzüka liasü.
Tanü asayamung tenzüka OCYU aser Moanungsang Memorial S/C na asayaba telok katia goal kata magütsüteti, 0-0 nung tembanga liasü.
Asayamung nung shilem agir team ajak agi 21 lir. Team-temji Group A nungi H tashi küma lemsar asayatsü asoshi asayaren renema lir. Group A nung OCYU, Moanungsang Memorial S/C aser Mongsenbai Youngsterz F/C-tem lir. Group B nung Elation S/A, Stardom United F/C aser Mongolian United. Group C nungbo Youngstar S/C aser Tepenjem Rugo Mokokchung na dang lir.
Group D nunga Shitilong S/A aser Sports Society Suyim na dang lir. Group E nung Dilong Y/A, Arikodong Club aser Tongpang Riju Club-tem lir. Group F nunga Y/A Marepkong aser yaküm champion Fusion S/C na dang lir. Group G nung Tongdenyong S/C, Hills F/C aser Grasshoopers aser Group H nung Alempang Y/A, Socianian F/C aser Telungjem F/C nungertem lir.
Taküm iba asayamung nung tematiba takok angur champion team nem tanga senpet den sen lakh ka (100000/-) aser tanabuba jenjang Runner-up nem sen meyi roker (60,000/-) agütsütsü. Semi final nung tsüker telok ana nema sen meyi ter pungu-ngu (15,000/- each) agütsütsü, ta tayongertemi metetdaktsü.
Taküma nija senpet/sempet; highest scorer, best keeper, best defender, most promising player, player of the tournament aser best discipline team itemji shima agütsütsü, ta tayongertemisa metetdaktsü. Iba den ano osang tajung kaji; quarter final nungibo asaya shia teyari (match allowance) agütsütsü, ta parnokisa shisem.
October 5, Bodbarnü anepdang 9:00 ako nungi tenzüka Mokokchung Imkongmeren Sports Complex nung asaya pezü asayatsü. Mezüng asaya nung Elation S/A o Stardom United F/C, tanabuba nung Young star S/C o Tepenjem Rugo Mokokchung, tasembuba nung Shitilong S/A o Sports Society Suyim (SSS) aser pezübuba nung Dilong Y/A o Arikodong Club tem asayatsü.
Tanü sentong nung Youth Resources & Sports Director Wt. Asangla Imti, Mokokchung Deputy Commissioner & Mokokchung District Sports Council tir Wb. Sushil Kumar Patel (IAS), MDFA organizing Committee mendenbuba Wb. Aodangnok parnokia tepela o den tayongzükba o tulu bener arua tesentepertem den lemsatep.

Day 2: MDFA Trophy 2016 – Time 9:00 AM
* Elation S/A Vs Stardom United FC
* Youngstar SA Vs Tepenjem Rujo Mokokchung
* Shitilong SA Vs Sports Society Soyim
* Dilong Y/A Vs Arikodong Club