2016 nungi sorkar den demonetisation atema jembi: Urjit Patel

New Delhi, January 18 (Agencies): Bodhbarnü Reserve Bank of India (RBI) Governor, Urjit Patel-i Parliament indang standing committee on finance dang, 2016 küm tetenzüklen nungi demonetisation onük atema Central bank aser sorkar den jembia aruogo, ta metetdaktsü.
Parliament indang Finance standing Committee dang Patel-i, demonetisation sülen sen notes tasen lakh crore 9.2 lemzükja amshidar, ta metetdaktsü.
Linük nung ochimashi sen billion aika kaktettsü atema tawa linük nung sen 500 aser 1,000 notes (shilem 86) anentsüba dak sentakba nung Finance indang Parliamentary committee-i asüngdangba aika Urjit Patel-i langzüa liasü.
Yaküm November 8 nü sorkari demonetisation sülen sen 500 aser 1000 notes lakh crore 15.4 shi intokogo, ta paisa metetdaktsü.
Iba committee nung lenirji Congress lenir, Veerappa Moily lir, aser taoba mapang Ato kilonser, Manmohan Singh-a züngsem lir.
Banking Secretary Anjuly Chib Duggal, Department of Economic Affairs Secretary Shaktikant Das aser Revenue Secretary Hasmukh Adhia nunger densema tongti ketdangser kar iba senden nung aden aser parnokia committee dang demonetisation indang rasaa ashiba den külemi ibaji ajanga linük rongsenkettsüng nung kongshiba indang metetdakja liasü.
RBI-i parnok nem agütsüba kija tashi mamshir, saka Centre sorkari tuyubatem tashi angar ta opposition-i RBI mejungi aitsüdar, iba den külemi opposition-i RBI Governor, Patel-i pa menden nungi alutsüla ta takhangba agütsür.
Yashi Mumbai nung osangbenertem senden ka nung taoba mapang Maharashtra Chief Minister, Ashok Chavan-i, Urjit Patel-i pa menden nungi anentsüla, ta takhangba agutsü.
Taoba mapang state Chief minister, Sushil Kumar Shinde-ia, “Narendra Modi sorkar kübok RBI-i indang nija tashi makai kümogo. Demonetisation ya nisung ka kijai (Modi) lemtetba lir. Anungji onoki Urjit Patel anentsü akhanger,” ta ashi.
January 20 nüa RBI Governor-i Parliament indang Public Accounts Committee (PAC) nem telangzübatem agütsütsü.