2016 Olympics: India hockey telok Rio tonga ogo

Brazil kübok Rio de Janeiro yimti tonga aoba sülen India’er hockey teloki agiba arok noksa ka yangi angur. (Rio de Janeiro, July 30)

Rio de Janeiro, July 30 (Agencies): Taruba August ita 5 nü nungi tenzüka Brazil kübok Rio de Janeiro yimti nung asayatsü ayongba 2016 Rio Olympics nung takok tulu ngua shilem agitsü alizüng ayur India’er tetsür aser tebur hockey telok yashi, Hokolbar nü Rio yimti tonga ogo.
Tebur hockey teloki Spain kübok Madrid nung Spain telok den terenemshitsü asaya 2 tashi asayaba sülen Rio bushia ao aser tetsür telokia Canada aser America tsürtem den terenemshiba agia asayaba sülen tan Rio tonga aoba osang jangjaogo.
Tan Olympics nung shilem agitsü temeten anguba ya India’er tetsür teloki küm 36 shi nung tan mezüngsüa Olympics nung shilem agitsü jenjang angur lir.
Pool B nung densemba India tsürtemi Argentina, Australia, Great Britain, United States aser Japan teloktem den toktepa asayatsü lemzüka lir aser par teloki mezüngbuba asaya Japan tsürtem den taruba August ita 7 nü asayatsü.
Ano, tawa London nung Champions Trophy takok marok agizüker tebur hockey telokia par tetenzükba Olympics asaya Ireland telok den taruba August ita 6 nü asayatsü lemzükogo.
India’er tebur teloka Netherlands, Argentina, Germany, Ireland aser Canada nunger densemba Pool B nung densemba osang jangjaogo.
Pool shia nung temaba jenjang 4 tashi angur telok 4-i quarterfinal nung shilem agitsü temeten angutsü.