2016 Rail Budget benokogo; ticket jenjang matur

New Delhi, Feb. 25 (Agencies): Tanü Lok Sabha nung 2016-17 Railway budget benokdang Union Railway Minister, Suresh Prabhu-i train ticket jenjang atutsü mesangdongba ajanga passenger tem kanga pelatepogo, iba den külemi pai superfast train asem senzütsü aser 2019 küm tashi nung freight corridors 3 renemtsü, ta metetdaktsü.
Railway budget benokdang pai, “Indian Railways indang tongtibangtiba nükjidongji ronsenkettsüng ainba gol ka asütsü aser mapa agütsüba den nüburtem tajungtiba nung tenzüktsü,” ta ashi.
Prabhu-i, “Tan budget nung tongti omen asemji- passenger tem akhümtsübua züngshiba, train tekaraba senzüba aser linük terenlok asütsü,” ta ashi.
Budget nungsa- linük nung tang mezüng Chennai nung rail auto hub, North-East den railway sentakteptsü aser railway station tem nung Wi-Fi densema lir.
Yaküm budget nungbo Union minister-i khu abenba train nung jenjang tua liasü, ajisüaka tan budget nungbo passenger ticket aser khu abenba naprong nung jenjang matu.
Taküm kümsa sen crore 92,714 indang project 44 inyaktsü, sen crore 40,000 indang locomotive factory ana amenoktsü.
Rail Budget 2016 tongtibang kar:
* Train nung teintet passenger tem aser tetsürtem atema lower berth timba wazüka yutsütsü.
* Anisüngzükba takdang online ajanga mekazüka yutettsü
* Taküm küm tatem tashi nung bio-toilet 17,000 tali yanglutsü
* Taküm kümsa railway station 100 dak tema nung WiFi agütsütsü aser sangküm station 400 nung agütsütsü.
* Tetsürtem nem All-India 24X7 helpline agütsütsü.
* Ticket mekazüka mayuba coach alitsü.
* Lendong mataloktsü atema joko rail crossings ajak nung tanükertem ayutsü sentong benoktsü.
* Train nung kinü tanurtem atema mamatzü aser tzü tatsük agütsütsü.
* Teintet rongotem aser shi aser shisatsü nung tanga memenepertem nem battery operated services agütsütsü.