2016 Rio Games: Brazil-i Olympic milen agizükogo

Greece kübok Athens nung tentetba Panathenaic Stadium nung sentong tajung ka agia, Hellenic Olympic Committee lenisang, Spyros Capralos (Abelen)-i Rio 2016 Tir, Carlos Nuzman nem Olympic milen amoktsüba noksa nung angur. (Athens, April 28)

Athens, April 28 (Agencies): 1986 küm nungi tenzüka Olympic Games asayadak, Greece kübok Athens nung tentetba Panthenaic Stadium nung sentong tajung ka agia, Brazil nem Olympic milen yashi, Bodbar nü amoktsüogo.
South America nung tan mezüngsüa asayatsü ayongba 2016 Olympics asayamong ya Brazil kübok Rio de Janeiro yimti nung taküm August ita  asayatsü sentong renema lir aser iba asayamong tepiyong Olympic milenji asayadak tsükloka ayutsü.
Akidang Olympics asayadak, Ancient Olympia nung anü tashi amshia taoba Brehostibar nü tsükloker külen Olympic milenji Greece ajunga ajangdanga anogo 6 agia jajaba sülen Rio Olympics tayongertem nem milenji amoktsü.
Greece nunger high jump Olympic medallist, Niki Bakoyianni-i asayadak telung tonga milenji bener asemba sülen külem sensotsür, rowing champion, Katerina Nikolairou-i asayadak milen tsüklokja liasü.
“Ozü linüki Olympic Games takok ngua ayongtsü aser shilem agir o tereprangertem ajunga tsüratemtsütsü nangzüker,” ta  Hellenic Olympic Committee lenisang, Spyros Capralos ket nungi Olympic  milen agizükba sülen Rio Games Tir, Carlos Nuzman-i sangoktsü.
Taküm August ita 5-25 nü tashi Rio yimti nung 2016 Summer Olympics asyamong asayatsü ayonga, asayamong asayatsü terenemshiba agiba mapang ka nung Brazil nung yimtenren mangatettep ken o tulu ajurushiba osanga jangjaogo.
Switzerland kübok Geneva-i milenji bener oa idakji tentetba United Nations nung sentong ka agiba sülen Olympic milenji taruba May ita 3 nü Brazil tonga bener aotsü.
Brazil tonga bener aoba sülen milenbener asayar 12,000 shi melentepa asemba sülen milenji Rio tonga August ita 5 nü bener aotsü sentong renema lir.
Tesüsaba Summer Olympic Games Greece nung 2004 küm ayonga asayaba osanga jangjaogo.