2016 tashi nung refugee nisung million 1.4 shi Europe atongtsü: UNHCR

Croatia ajangdanga aoba sülen Croatia arrtsü anasa, Hungary kübok Zakany yimtsüng nung refugee nisungtem tarensena nokdaka aliba noksa nung angur. (Zakany, October 02)

 United Nations, October 02 (Agencies): Taküm 2015 küm tsüngda nung pei linük toktsüba refugee nisung 700000 shii Mediterrean tzüyim ajanga Europe tonga aotsü aser sangküm 2016 küma nisung lakh 7 tashii Europe tonga oa idakji jenoka alitsü merangtsü ta United Nations High Commissioner for Refugees ((UNHCR)-i tanü Hokolbar nü metetdaktsüogo.

Ano, Europe nung refugee nisungtem anepalutsü asoshi nungdaktsü ta taoba September ita sangoktsüba dollar sen million 30.5-ji kanga dang ajema lir ta shia, parnok anepalutsü atema dollar sen million 128 shi nungdaka akümba oang ka par teloki metetdaktsü.

Par telokisa ashiba agi, Syria nungi nisung timba densema, refugee nisung 5,20,000 dak temai taküm 2015 küm tenzüker tanü tashi nung Europe tonga aoba aser Europe-i aotsü merangdang nisung 3,000 shi asüba osang bushiteta lir.

Yashi, Brehostibar nüa Greece sorkari Athens yimti kübok Victoria Square nung jenoka alir refugee nisung 400 tashi taoba mapang Olympic asayadak, Galatsi Olympic Hall-i anir orr idakji jenoka lidaktsütsü tenzükba osanga jangjaogo.

Greece linük ya refugee nisungtem, talisa Middle East aser Africa na toktsürtemi Mediterranean tzüyim ajanga Europe nung mezüngsüa tetsüng ajemokdak linük ka lir aser iba yongji par linüki tang refugee nisung den sentakba khuret tulu benoka lir.

Ano külen, Europe-i tang ajurushia aliba refugee nisungtem den sentakba khuret nung yaritepa kasaji bentettsütsü asoshi nungdakba maparen inyaktsü tajungshiba olen ka United Nations Secretary General, Ban Ki-moon-ia tawa New York yimti nung amenba UN senden nung shilem agir alima lenirtem dang metetdaktsüogo.