2016 tashi nungbo Polio meshimeshia samatsütsü: Pak

Islamabad, August 08 (Agencies): Sangküm 2016 küm tashi nungbo Pakistan linük ajunga nung polio tashidak meshimeshia samatsütsü alizüng tulu ayuba osang ka Pakistan sorkari tanü Honibar nü metetdaktsüogo.
Par mitkartemi Taliban teloki agi agia aliba tesemtem tanaben agishitsü tenzükba yong item tesemtem nung polio mozü agütsütsü maparen takümbo takok ngua agia par alizüngji asangsang nung ajangzüktsü teimla aliba osang ka sorkari metetdaktsü.
“2016 küm tashi nungbo Pakistan linük ajunga nung polio tashidak meshimeshia samatsütsü nükjidong yur külen Ato Kilonser, Nawaz Sharif-i National Routine Immunisation Committee ka tentettsüogo,” ta Pakistan National Health Services Minister, Saira Afzal Tarar-i ashi.
Sharif-i tan tentettsüba züngsem 3 densemba luden nung health minister aser defence minister na densema aliba osang ka Dawn osangia metetdaktsüogo.
“Taliban teloki mozü agütsütsü maparen kanga sashia nokdangba yong Waziristan aser tribal region ishika nung polio mesen kanga sashia arentsü tenzükba osang bushiteta lir,” ta Tarar-i metetdaktsü.
Ajisüaka, mitkartemi Taliban telok makdoktsü tenzükba yong item tesemtem nung alir rong nung polio mozü takok ngua agüja iba tashidak teti asoshi meshimeshia samatsütsü alizüng National Routine Immunisation Plan mapatongi yua lir ta lai ashi.