2016 Wimbledon: Serena aser Kerber na final asayatsü

London, July 07 (Agencies): Tetsür defending champion, Serena Williams-i mezüngbuba semifinal asaya koka tang tasayadak 2016 Wimbledon asayamong tetsür singles final asayatsü jenjang tanü, Brehostibar nü ajangzükogo.
Tan asayamong nung temaba jenjang abener, Serena-i tanü minute 49 nung points 6-2 6-0 ngua Russia tsür, Elena Vesnina ayong ayonga tsükdaktsü.
Arishi küm 34 tain America tsürla, Serena-i tan final asayatsü jenang ajangzükba sülen Germany tsür, Steffi Graf-i taoba mapang yangluba grand slam takok marok 22 agizükba otsü meneptsü alizüng asangsang nung ajangzüktsü asoshi asaya ka dang anünger lir.
Taoba mapang Wimbledon takok marok 6 ben tashi agizükla, Serena-i Germany tsür, Angelique Kerber den final tan Honibar nü asayatsü lemzükogo.
Arishi küm 28 tain Kerber-ia tanü points 6-4 6-4 ngua, Serena teyi, Venus Williams tanabuba semifinal asaya nung tsükdakja Serena den final asayatsü jenjang ngua liasü.
Tan asayamong nung 4 buba jenjang abener, Kerber-i tan final asaya kokra, külem sensotsür, Steffi Graf-i küm 20 tejaklen Wimbledon takok marok agizükba sülenbo Kerber tetsür singles Wimbledon takok marok agizüker Germany tsür mezüngbuba akümtsü.
Kerber-i Serena madak final asaya koka taküm January ita asayaba Australian Open tetsür singles takok marok agizüka liasü.
Ano külen, defending champions, India tsür, Sania Mirza aser Switzerland tsür, Martina Hingis nati tetsür doubles quarterfinal asaya nung tamakok ngua, tan asayamong nung joko toktepa shilem magitettsüsa jenjang tamajung tanü ajuruogo.
Tan asayamong nung 5 buba jenjang nung alir, Hungary tsür, Timea Babos aser Kazakhstan tsür, Yaroslava Shvedova nati tanü minute 68 nung points 6-2, 6-4 ngua, temaba jenjang nung alir Mirza o Hingis na tsükdakja tetsür doubles semifinal asayatsü jenjang angu.