2017 April 1 nungi GST mapa akumtsü Centre, state temi bangjemogo

New Delhi, September 22 (Agencies): Sangküm April ita mezüngnü nungi tenzüka Goods and Services Tax (GST) mapa küma benoktsü asoshi Brihostibarnü Centre aser state temi tax rate aser ozüng dak sentakba mapa atema mapang lateter inyaktsü bangjemogo.
Ajisüaka Centre-i state tem nem temenok senotsü agütsütsü onük nungbo obang mapur.
Tang tasen tentetba GST Council dang Tamil Nadu aser Uttar Pradesh state temi state shia vote kaka dang nungi taliba akhanger.
Union Finance Minister, Arun Jaitley-i aniba GST Council nung state 29 aser Union territory 2 nungi züngsemtem lir, aser iba senden maneni Hokolbarnüa amentsü.
Iba senden nung GST dak sentakba ozüngtem lemshi aser saru memeshitsü aser takoksa anguba atema temenok sen agütsütsü onüktem nung o lemtepa liasü.
Tesülen osangbenertem den jembidang Jaitley-i, “Tanü, September 22 nü nungi tenzüka November 22 tashi onoki asoshi mapang ita ana lir, iba mapang nung tongtibang onüktem jembia latettsü, ibayongji ‘timetable’ ka latet aser ibajia agizükogo,” ta metetdaktsü.