2017 ICC Champions Trophy Pakistan-i akok

London, June 18 (Agencies): 2016 ICC Champions Trophy marok bena aliba telok, India aser Pakistan tsüngda The Oval nung 2017 Champions Trophy indang final Deobarnü asayaba nung Pakistan-i runs 180 agi India madak takok angu. Iba cricket asaya nung Pakistan teloki mezüng batting asüba nung wicket pezü out süa runs 338 yanglutet aser India teloki iba runs meneptsü arishiaka par telok over 31 nung runs 158 dang nguteta lia ajunga out sütsü.
Pakistan telok nungi Mohammed Amir-i kanga junga ball aonba ajanga India telok nungi batting asür tajungtem, Rohit Sharma (0), Virat Kohli (5) aser Shikhar Dhawan (21) out sütsütet. India telok nungi Hardik Pandya-i tajungba asayatet aser pai runs 76 yanglutet saka India telok ya runs 158 dang lia over 30.3 nung ajunga out sütsü.
Pakistan telok nungi opener, Fakhar Zaman ya Jasprit Bumrah-i over pezübuba nung out sütsütsüa liasü saka ibaji ‘no-ball’ asüba ajanga out masü aser pai runs 114 yanglutet.
Pakistan telok nungi Azhar Ali-i runs 59, Mohammed Hafeez-i runs 57 aser Babar Azam-ia runs 46 yanglu.
Iba asayatsü asoshi toss asayaba nung India-i akok aser Virat Kohli-i mezüng bowling asütsü shimteta liasü.