2017 küm Assam nung bandh ajanga sen crore 1,028 akoksa

Guwahati, Metsüremi (March) 26 (Agencies): 2017 küm Assam state ajungalen mokdangba sentong 17 tashi ayonga agiba ajanga sen crore 1,028 dak tema akoksaogo, ta tanü Assembly nung Commerce and Industry Minister, Chandra Mohan Patowary-i metetdaktsü.
Senji teimba asütsü kechiyong tang asadangba nung local aser district jenjang nung akoksaba densema mali, ta paisa ashi.
BJP MLA Mrinal Saikia-i tasüngdangba ka benokba atema Patowary-i langzüdang, “Assam nung mokdangba sentong 17 aliba ajanga State Domestic Product (SDP) nung sen crore 1,028.50 akoksa” ta ashi.
State kübok telok balalai National Highways mokdanger lungkak aitba sentong 184 tashi agi, ta Patowary-isa shisem.
“2017 küm telok balalai local bandh 18, district bandh 42, Assam bandh 17 aser Bodoland Territorial Area Districts (BTAD) bandh 4 tashi ayonga agi” ta paisa metetdaktsü.
Iba ama bandh ya ozüngi memelar ta Supreme Court-i oshidang agütsüogo aser iba ozüngji amshitsü atema state sorkari mapa inyakdar, ta Patowary-isa ashi.
2012 küm Gauhati High Court nung PIL ka benokba nung state sorkari Assam nung bandh noktangtsü atema ozüng ka yangludar ta shia lir.
Iba nungji ajemdaker ‘The Assam Prohibition and Prevention of Bandh Bill, 2017’ yangluogo aser tang state sorkari ibaji jungjunga shisadangdar, ta Patowary-isa metetdaktsü.