2017 küm Flipkart-i nisung tali anioktsü sentong lir

New Delhi, March 05 (Agencies): Online nung kanga tongti süa shishilembaba, Flipkart nung mapa inyaker taoba küm dang nungi 2017 küm shilem 20-30 agi timba ayutsü sentong lir, ta metetdaktsü.
Flipkart ya Bengaluru nung amenoka lir aser India nung shishilembaba nung temaba jenjang atongtsü asoshi US indang Amazon den tokteper.
“Flipkart nung terenlok tali akümba ajanga tesem ajunga nung nisung peria alitsü asoshi 2017 küm iba company nung inyaktsü asoshi taoba küm dang nungi taküm shilem 20-30 agi teimba anioktsü sentong lir,” ta Flipkart indang COO, Nitin Seth-i ashi.
Taoba küm Flipkart ajanga nisung 1,500 shim aser benjung mapang khen atema mapa inyaker nisung 10,000 shi shima liasü.
2015 küm online ajanga shishilembaba ya shilem 180 agi tali renlok saka 2016 küm iba terenlokba ya shilem 12 dang liasü aser iba ajanga taoba küm sen billion $14.5 aazük, ta online ajanga shishilembaba bushisüngdangba telok, RedSeer ajanga metetdaktsü.
Flipkar tenzüktsü asoshi Morgan Stanley ajanga sen billion $5.37 inokja lir. Iba ama Snapdeal nunga SoftBank ajanga teyari agüja liasü, saka taoba ita nung parnoki toktsüba ajanga iba company nung inyaker nisung 600 shi mapa nungi anentsüsa aküm.
Shishilembaba nung tabu balala ajanga tetokteper aika aliba ajanga Chennai nung online ajanga hotel room jelia makaa ayuba sentong agütsür, Stayzilla anen.