2017 küm India nung tasüba temerenshi shilem 27 ajemogo

New Delhi, Tsüklai 03 (Agencies): 2017 küm sessions courts-i tasüba temerenshi obendang agütsüba shilem 27 shi ajema liasü, ajisüaka tetsür dak tashiyim mapa inyakba dak sendakba nung nisung tepsetba ken o nung aija alirtem nem tasüba temerenshi obendang agütsübabo shilem timba akum, ta National Law University (NLU)-i metetdaktsü.
‘Death Penalty in India, Annual Statistics for the year 2017’ ta ajaba report ajanga metetdaktsüba agi, 2016 küm nisung 149 nem tasüba temerenshi obendang agüja liasü, ajisüaka 2017 küm nungbo nisung 109 nem dang tasüba temerenshi obendang agütsü.
Yaküm sessions courts-i nisung 109 nem tasüba temerenshi obendang agütsüba nungi ken o 53 bo tanaben reprangshia temerenshi tajemba obendang agutsü aser nisung 35 dak kuli teperi menguteti chiok, ta kasa osang ajanga metetdaktsü.
Ajisüaka kasa mapang nungjisa tetsür dak tashiyim mapa inyakba dak sendakba nung nisung tepsetba atema aija alirtem nem tasüba temerenshi obendang agütsübabo shilem timba akum; item ken o dak sendakba nung aija alir nisung 47 nem tasüba temerenshi obendang agütsü, aser ibaji 2016 küm dang nungi 19 (nisung) agi timba liasü.
India nung tasüba temerenshi obendang anguba timtibaji Maharashtra state nungi (nisung 67) liasü.