2017 küm Indian Army-i Pak nunger sepai 138 tepset

New Delhi, Aenjeti (January) 10 (Agencies): 2017 küm tactical operations aser Jammu & Kashmir kübok Line of Control (LoC) arrtsülen khatepdang Indian army temi Pakistan nunger sepai 138 tepsetogo, ta tanü sorkar intelligence osang ka ajanga metetdaktsü.
Kasa mapang nung LoC nung Indian nunger sepaitema 28 tashi asü, ta kasa osang ajanga ashi.
Pakistan Army temi par sepaitem aika asübaji magizükteter, ibayongji parnoki sepai karbo civilian asüba ama sayur, ta kasa osang ajanga ashi.
Tesüiba küm ka tsüngda arrtsülen Pakistan-i ceasefire alema inyakba aser Jammu & Kashmir nung kiralongrartem mapa anema Indian Army temi sashia inyakogo.
2017 küm tactical operations aser LoC nung arrtsülen khatepdang India sepaitemi Pakistan Army 138 tepset aser parnok 155 yirutsüogo, ta intelligence osang ajanga metetdaktsü.
Kasa mapang nungjisa Indian Army tema parnok 70 yirua liasü.
Army otongdar, Col Aman Anand-i, Pakistan sepaitemi ceasefire ozüng alema inyakba shia India army temi ibaji anema sashia inyakdar, aser maneni inyaktsü, ta ashi.
Official osang ajanga ashiba agi, 2016 küm Pakistan sepaitemi ceasefire ozüng alema 221 ben inyak ajisüaka 2017 küm nungbo 800 dak tema inyaka liasü.
Intelligence osang ajanga ashiba agi, 2017 küm Indian Army-i sniper firing ajanga Pakistan sepai 27 tepset, aser LoC nung sniper firing ajanga India nunger sepaitema tenet asü.