2017 küm Sri Lanka-i India nunger angopur 251 chiokogo: Sushma

New Delhi, August 03 (Agencies): Taküm küm India-i Sri Lanka nunger tepoukdak aliba India nunger angopur 251 kümzükogo aser rong 42 nguogo, ta tanü External Affairs Minister, Sushma Swaraj-i metetdaktsü.
India nunger angopurtemi Sri Lanka nunger tzüyim nung ozüng alema ango apuba atema India nuner angopur aika pua liasü, aser item angopurtem kümzüktsü atema sorkari meranga inyak, ta tanü lai Rajya Sabha nung metetdaktsü.
Swaraj-i, taküm July 31 nü tashi nung Sri Lanka nunger ket nung India nunger angopur 251 aser rong 117 liasü, ta metetdaktsü.
Laisa, sorkari ango apuba ajungkettsütsü atema sen crore 1,500 indang scheme ka tenzükogo, koba ajanga angopurtem timtem pungbatsü, ta metetdaktsü.
Swaraj-isa, India nunger angopurtem tekaraba nung chioktsü atema sorkari Sri Lanka sorkar den jembia liasü, ta ashi.
Sri Lanka ketdangsertemi India nunger angopurtem apuba onükji Ao kilonser, Narendra Modi densema temaba jenjang nung jembia liasü, ta minister-isa metetdaktsü.
“Angopurtemji July 27 nü court matsüngdangi anir ao, aser court-i parnok nem August 10 tashi judicial custody agütsü. Ketdangsertem tsüngda ken o jembiba ajanga July 28 nü item angopur chiokogo,” ta laisa shisem.