2017 küm tashi nungbo yimtsüng ajak nung light alitsü

New Delhi, November 07 (Agencies): Deendayal Upadhyaya Grameen Jyoti Yojana (DDUGJY) kübok India linük nung light maliba yimtsüng ajak nung 2017 March ita tashi nungbo light mesüoktsü atema state aser Union territory ajak nungi Power minister temi lemtetogo.
Anogo ana tashi Kochi nung state ajak nungi New renewable energy aser mines minister tem senden kaogo aser Honibar nü tembangogo, aser iba senden nung 2019 küm tashi nungbo mesüra iba jakdang light teti arutsü (24×7) atema inyaktsü lemteta yuogo.
‘Power For All’ atema sentong aliba state tem nung iba maparen ano renema mali, aser ibaji consultants aser central team züngsemtem teyari agia taküm December ita tashi nungbo tembangtsü bangjema yuogo.
Power, coal & renewable energy Minister, Piyush Goyal leniba nung agiba senden nung, state tem nem senotsü lemzüktsüba ita nungi tenzüka ita 30 tsüngda Integrated Power Development Scheme (IPDS) project tem tembanga inyaktsü lemteta ayu.
Haryana, Uttar Pradesh, Punjab, Maharashtra, Karnataka, Tamil Nadu, Madhya Pradesh, Andhra Pradesh aser Telangana state tem nung küm ka tsüngda tang aliba alu nung amshiba water pump shilem 10 melentsü lemtetogo.
Senden nungsa mapang lateta yur solar parks amenoktsü aser sorkar building tem nung solar roof tops inoktsü lemteta yuogo.
Smart Grid atema state tem nung state level mission tentettsü. Right of Way (RoW) aser Right of Use (RoU) policy maliba state tem nunga iba ya tenzüktsü atema tekaraba nung mera agitsü.
Goyal-isa, sangküm financial year sentsük makai junga tenzüktettsü atema state tem dang power generation company temi senotsü magütsü alibaji March 2016 tashi nungbosa agütsüseptsüla, ta nenshia shiogo.