2017 küm tashi taittiba linük 8 rongnung India densema lir

Washington/New Delhi, January 26 (Agencies): 2017 küm alima nung tashi taittiba linük 8 rongnung China aser Japan linük na sülen India jenjang 6buba nung lir aser mezüngbuba jenjang nung US lir, ta American foreign policy magazine ajanga metetdaktsü.
Iba tarensen mezüngbuba jenjang nung US lir aser China o Japan na tanabuba jenjang nung lir. Russia jenjang 4buba nung lir aser pongububa jenjang nung Germany lir, iba sülen India jenjang 6buba nung lir.
Tashi taittiba linük tarensen jenjang 7 aser 8buba nung Iran aser Israel na lir.
American Interest magazine-i sangdong ka ajanga, “Alima nung tashi aliba linüktem tarensen nung Japan amai India-a aiben sendoker, ajisüaka alima sabang nung jenjang tajung rongnung lir,” ta metetdaktsü.
Alima nung democracy tulutiba linükji India lir aser English jembiba nütsüng timtiba aliba linüktem tanabuba jenjang nung India lir, iba den külemi rongsenkettsüng kanga kera ainba linük ka lir, ta kasa osang ajanga ashi.
Alima nung yimtenren tesentaktep tsütsü India dak rangloker jenti lir: China, Japan aser United States linüktemi India den Asian security architecture nung külemi inyaksemner, aser EU den Russia-i India den shishilembaba aser defence nung tezüngzüktep aginer, ta American foreign policy magazine ajangasa ashi.
“Ato kilonser, Narendra Modi lenisüba kübok India-i alima tashi aliba linüktem rongnung denogo,” ta parnokisa ashi.
“Modi-i US aser Japan naprong den navy nung amalitepa inyaktsü atema mera agia inyak aser India mitkar jenjang tajungba akumtsü asoshi Russia, France aser Israel den defence tezüngzüktep aika agiogo,” ta parnokisa ashi.
“Middle East aser East Africa nungi Southeast Asia tashi India-i rongsenkettsüng aser security mapatong naprong nung jenjang ajungketa tashi tulu aliba linük Britain aser France jenjang tongtetogo,” ta American foreign policy magazine ajangasa metetdaktsü.