2017 küm UP nung BSP tashii arutsü: Mayawati

Lucknow (Uttar Pradesh), November 09 (Agencies): Tanü BSP tongti lenir, Mayawati-i, BJP indang mapatong tai aser communal melungsentsü anema Bihar nüburtemi grand alliance nem vote agütsü, aser Bihar election osang ajanga, 2017 küm Uttar Pradesh nung lar sorkar tashii arutsü, aser ibaji kecha tashi agia menokdangtettsü ta kuli sayur, ta ashi.

“Bihar nüburtemi BJP indang mapatong tai aser communal melungsentsü anema Nitish Kumar aser Lalu Prasad Yadav nunger nem vote agütsüogo, ibayongji BSP candidate tem tamakok angu,” ta Mayawati-i sangdong ka ajanga ashi.

“Bihar nung iba (election) ya grand alliance aser BJP na tsüngda kija raraba ka kümadok…aser yangji (Bihar) BSP-i tamakok angutsüsa akum,” ta lai ashi.

Ajisüaka Mayawati-i, Dalit anemertem, minority anemertem Bihar nung tashii maruba atema BSP pelar, ta ashi.

“Iba atema ya Bihar nüburtem nem tenüngsang agütsütsüla, mesüra ibaji ajanga taruba Uttar Pradesh assembly election nunga kongshitsü liasü,” ta lai ashi.

Laisa ashiba agi, BJP-i, parnok Bihar nung tashii arura Uttar Pradesh nunga tashii arutsü ta bilema liasü.

“Bihar election osang ajanga UP nung BJP aser Samajwadi Party mejungi kongshitsü, aser tangbo Uttar Pradesh nung tashii arutsü atema shingaia menokdangtsüettsü ta BSP-i melung lema bilemer,” ta BSP tongti-isa ashi.

“Tawa Uttar Pradesh panchayat elections agidang BJP khenyongi atsüngdaksüogo aser Samajwadi Party-a BSP sülen dang lir. Bihar election nung Samajwadi Party-i BJP den tangatettep liasü, BJP party ajangzüktsüsa parnoki (SP) par candidate tem toktepdaktsü,” ta laisa shisem.