2017 May tashi nung yimtsüng ajak nung light alitsü : Piyush Goyal

New Delhi, October 9 : Center nung NDA sorkar arur anogo meyirijang ka tashi nungbo India nung yimtsüng ajak nung light enoktsütsü ta nangzüka aliba mapa renemtsü küm ka lia 2017 kümbo yimtsüng ajak nung electric light agi tongadoktsü ta Union Minister Piyush Goyal-i yashi Honibar nü metetdaktsüogo.
Iba nükjidong atongtsü asoshi state sorkar nem ‘soft loans’ agütsütsü ta Union Minister of State (Independent Charge), Power, Coal, New & Renewable Energy & Mines, Goyal-isa metetdaktsü.
Pai iba o ya anogo ana asoshi linük nung state aser Union Territoroies ajak nungi Power, New & Renewable Energy & Mines minister-tem senden ka ayongzüka agiba sentong mapang osangbenertem den jembidang metetdaktsü.
” Tzünglu aruba agi taoba ita ana tashi yimtsüngtem nung light enokja aoba mapatem tera anena lir aser tang senden nung state shia nungi arur minister-tem den jembiba sülen May 1, 2017 anogo tashi nungbo linük nung yimtsüng ajak nung electric light agi atongtsü imlar ta paisa ashi. Ibaji NDA sorkari anogo meyirijang ka tsüngda May 2018 tashi nungbo mapa küma inyaktsütsü ta nangzüka aliba anogo nungi küm ka agi jelia May 1, 2017 tashi nungbo atemtsü,” ta ministerisa metetdaktsü.
” Iba sentong ajanga yimtsüng ajak nung light atongtsü asoshi state-tem nem soft loans agütsütsü,” ta paisa ashi.
Tan Power minister-tem sentepba senden nungji pei pei state nung kongsa light nüngdakertem itemji bushia oagi light agi tongtsütsüsa inyaktsü atema mulungtepa jembiogo.
Iba sentong dak aketba indang lemsatepdang, Union Power Secretary P K Pujari-i ashiba agi, iba sentong ajanga linük nung taruba küm 10 tashi nung nungbo electric power peritsüsa inyaker, anungji item sentongtem ya ano mongin nisungtem den shisalemsatepa inyaktsü ta Pujariisa metetdaktsü.
Ano, Goyal-isa ashiba agi, state-tem den shisalemsatepa amongba mapang linük nung hydro power projects tila yanglutsü asoshi takoktsü lenmang bushiteptsü indang jembia liasü. Iba atema pai Power Finance Corporation aser Rural Electrification Corporation dena jembiogo.