2017 MDFA osang: YA Merepkong final tongogo

Mokokchung, October 18 (TYO): Imkongmeren Sports Complex, Mokokchung nung tang tesaidak 2017 MDFA asayamung mezüngbuba semifinal tanü asayaba nung Youth Association Merepkong-i Mongsenbai Youngsters tsükdaktsü.
Youth Association Merepkong ya Pool A nungi iba asayamung tenzükba mapang nungi kanga junga asaya aru aser Mongsenbai Youngsters ya iba asayamung nung aikati temolung malem, saka semifinal tongteta liasü.
Asaya tenzükli Mongsenbai Youngsters temi iba asaya amokbanga asaya aser goal aiben yoktsü merang. Aser par telok asoshi Khriethozo-i mezüng goal agütsütet.
Saka Youth Association Merepkong nungi kanga junga shisadanga asaya aser midfield tashi itshia iba telok nungi Jersey No. 10, Keyiceleung-i asaya tenzüker minute 37buba nung mezüng goal agütsüteta mezüng shilem asaya 1-1 nung tembang.
Asaya tanabuba shilem tenzüker mapang talangka melie Youth Association Merepkong nungi Keyiceleung-isa tanabuba goal agütsü.
Asaya tenzüker minute 57buba nung Youth Association atema goal asembuba ya Keyiceleug-isa yokteta pa asoshi hat-trick agitet.
MDFA asayamung nung Youth Association Merepkong telok ya tang mezüngbuba final tongteter lir.
October 19 nung 2buba semifinal Rongpang Reju Arkong aser Zonipang SA tsüngta asayatsü.