2017 Nagaland melenshi küm

Taküm 2017 küm January ka nü New Year benjong mongerbo January 2 nungi tenzüka Nagaland nung Urban Local Bodies (ULB) election magidaktsütsü asoshi nübortemi sentong tapu balala ayongzüka nokdang tenzükba tang Chief minister melentsüba tashi nung temogo. Atangji, Nagaland Municipal Act nung nübortemi memulungba arla kar alinungji, itemji yanglushir külenang election agitsüla ta nübortemi nokdakba dak alaka chief minister melentsü tashibo tebilema mebilemi liasü. Ajisüaka, government nung alirtemi nübortem ola mangai onsara tekong meranga nokdakba ajanga nisunga asem tashi asü aser Kohima nung government ki aika rongdokogo. Iba denji taoba ita ana nübortem aika pei mapa meinyaki iba mapa nung nübo aser rongsen laluba den ano ita junga dokan melapoki amongba takoksaji mapang talangka nungang menoktettsü. Item ajakji government nung alir Chief minister-i anir yimsüsür aser ketdangsertemi nübortem tenzüker ta mebilemi pei bilemba aser pei jangraba dang inyaktsü merangba ajanga atalokogo. Jungjunga bilemdangra, ULB election agitsübaji nübortem ajungtsü asoshi aginür saka nübortemi kenyongi magitsü ta anema nokdakra kangshia tashiyim agi election agitsü menüngdaki liasü. Ajisüaka, government nung alirtemi kechisüdirsüaka ULB election agitsüla ta nokdakba kuliji Urban Development atema Delhi nung sen crore aika Nagaland asoshi lemzükja lir aser aji election agia ULB tentet nung dang angutsü, anungji senji angutsü atema election agitsüla ta bilemba kuli liasü. Tetezü yimsüsürtem asoshi nübortemi adokba ola dangbo oagi Delhi nung akaba sen olaji tuluba liasü. Aji oda, oagi Delhi nung akaba sen dang angu ashi, yangi Nagaland nung nisungtem timatemba jenjangbo mangu aser nübortemi adokba olabo kenyongi mangashi ta kümadokba agi nübortem talila timtemogo.Tetezü ULB election dak sendakba nung Nagaland timatemba aser akoksaba ajunga ya sen indang bilemba ajanga atalokba liasü. Joko, tang tashi nung atalokba timtem aser takoksa ya ajanga nüngdakyonga aser aginüyonga ” amtsük (sen) kisüng agidangbo nisung taküm malir,” ta yimsüsür aser nübortemi angatettsüla. Tangbo asenok shisatsü nung sen bilemba dak alaka asen lima ajungtsü asoshi shisatsü tajung bilembabo kecha mangur. Election arura nübortemi sen dang bilema candidate bushir aser election temer külen candidate-temi nübortem bushir masü saka sen dang bushir ta küm aika asenok lia arur. Joko, tang ajuruba timtem nung ya tan ser asenok ajaki sen masü saka ochi bushi tenzüktsüla. Aji oda, taküm 2017 küm tenzükli nungi pei mapa kecha meinyak Nagaland ajungtsü asoshi nübo, mapang aser rongsen ajak tenla agüja nübortemi government telemtetba anema nokdaktetba ya Nagaland tajungba küma melenshi tenzüker asütsü. Ibaibo nübortem longjemer alima yanglushitsü asoshi apusoba mapa lir. Aji oda, government-ji governor aser Chief minister mesüra council of ministers-ji masü saka nübortem lir ta ajaki angatetogo. Joko, tang nungibo government nung yimsüsür aser ketdangser kati danga nübortem anema ochimashi aser meshitaki inyakra, pa mesüra la anema nübortemi ola adokba tashiji tulu alitsü. Tang Nagaland nung temelenshi tajung ka adoka angubaji, shingaia pei kin mesüra pei nisung mesüra pei party pur ta mezüngshii Naga nunger asoshi kechi tajung aser kechi shitak, idakji kanga akanga aser tasü itta nokdakogo. Ashi, akhidang amato pei kin mesüra pei nisung tejak repranga inyak asübo anogo paikaya mokdangba sentong nung menokdaktetla. Aji oda, tetsürtemang teimba aser teburtemang teimba ta tangattetba nung shilem agiba angudang, iba mapang aser sentong ya ULB election asoshi masü saka Nagaland raksar aliba yanglushitsü tenzüker ta angateter. Joko, yakta election arutsü, iba mapang nungjia tanü amai talisa asernok Aotsür Aortemi pei akok nübo aser rongsen tenla agüja nübortem meima tenzüktsü pur tetemsü nübo tajung shimteta yaritsü imlar. Aji oda, ibai Nagaland yanglushiba mapang aser iba mapa nung asenok senso shiai pei akok tenlatsü aser shilem agitsü nüngdaker.