2017 nungi phone aika nung WhatsApp mamshitetsü

New York, December 03 (Agencies) : Nüburtemi kanga sapua amshiba nüngtugu messaging app, WhatsApp, taküm küm matemdangsa phone upgrade mesüra 2017 küm nungi smartphone million aika nung mamshitettsü, ta osangbenertemi ashi.
The Mirror osangkaket nung ashiba agi, ita shia nisung billion ka shii amshiba, WhatsApp ya technology upgrade asüba ajanga phone tejentem nung mamshitettsüsa akümtsü.
“Item mobile tem ya onok atema kanga tongtiba lir, saka item phone tem nung tarutsü mapang nung iba app amshitettsüsa maongka magütsütet südi,” ta WhatsApp otongdari blogpost ka ajanga metetdaktsü.
2017 küm nungibo phone tejentem nung iba service ya mamshitettsü, ta company sangdong ka ajanga metetdaktsüogo.
“Taruba küm 7 atema shisadanga inyakdang onoki nisung timbai amshiba, mobile dak rangloker inyaker,” ta otongdari ashi.
Otongdari parnok indang blog nung WhatsApp mamshitettsü phone kar dena lemsatepogo aser item rongnung Android 2.1 aser Android 2.2, Windows Phone 7 aser iPhone 3GS mesüra iOS 6 phone tem dena lir.
Osang kar ajanga ashiba agi, ano iPhone 4, 4S, mesüra 5 tem operating system tasenba, iOS 10, küma upgrade mesüra WhatsApp mamshitettsü.
Aji oda süaka, BlackBerry OS, BlackBerry 10, Nokia S40 aser Nokia Symbian S60 phone tem nung June 30, 2017 tashi WhatsApp amshitettsü metetdaktsüogo.